Sankt-Peterbýrg qalasynda ótetin Eýraziialyq ekonomikalyq odaqtyń beiresmi sammitine Joǵary eýraziialyq ekonomikalyq keńestiń Qurmetti tóraǵasy retinde Tuńǵysh Prezident – Elbasy Nursultan Nazarbaev qatysady. Bul jóninde Prezidenttiń baspasóz hatshysy Berik Ýálige silteme jasap "Ult aqparat" habarlaidy.
«Maǵan Memleket basshysy Qasym-Jomart Toqaevtyń Sankt-Peterbýrg qalasynda ótetin Eýraziialyq ekonomikalyq odaqtyń beiresmi sammitine qatysý-qatyspaýyna bailanysty suraqtar kelip túsýde. Osyǵan orai atalǵan sammitke elimizdiń atynan Joǵary eýraziialyq ekonomikalyq keńestiń Qurmetti tóraǵasy retinde Tuńǵysh Prezident – Elbasy Nursultan Nazarbaev qatysatynyn habarlaimyn. Qalyptasqan tájiribege sáikes, Memleket basshysy men Elbasy shet elge birge saparǵa shyqpaidy. Elbasy tiisti qujattardy talqylaý barysynda óz pikirin aitýǵa quqyly. Qujattarǵa qol qoiý quzyreti Prezidentke tiesili», - dep jazdy Berik Ýáli Facebook paraqshasynda.
Qasym-Jomart Kemeluly 20 jeltoqsanda Ulttyq qoǵamdyq senim keńesiniń kezekti otyrysyna qatysyp, sóz sóileýdi josparlap otyr.
