Memleket basshysy Nursultan Nazarbaev óńirlerdegi 20 JOO-ny Nazarbaev Ýniversitetiniń deńgeiine jaqyndatýdy jáne 200 kolledjdiń jumysyn kúsheitýdi tapsyrdy, dep habarlaidy QazAqparat tilshisi.
«Prezident Apparatynyń saýalnamasy boiynsha jumys berýshilerdiń 70 paiyzy kásiptik jáne tehnikalyq bilim alyp, jumysqa ornalasqandarǵa kóńili tolmaityn bolyp shyqty. Ómir tez ózgerip keledi. Jańa tehnologiialar mamandyqtardyń jańa daǵdysyn talap etedi. Mine, sondyqtan, jastarmen kezdeskende 20 negizgi JOO-ny jańǵyrtý tapsyrmasyn júktedim. Árbir oblystaǵy negizgi JOO-lardy Nazarbaev Ýniversitetiniń deńgeiine jaqyndatý kerek. Álbette, 100 paiyz jaqyndatý múmkin bolmas. Dese de, bilim sapasy boiynsha jaqyndatýǵa tiispiz», - dedi Nursultan Nazarbaev.
Memleket basshysy sonymen birge árbir óńirdegi 10 kolledjde zaman talabyna sai jańa mamandyqtardy oqytý kerektigin atap ótti.
«Ár oblysta qandai mamandyqtardyń kerektigi belgili ǵoi. Bizde jumyssyzdyq degen másele joq. Bizde mamandyq degen másele bar. Jan-jaqtan, oblystardan Astanaǵa keledi. Barlyq jerde qurylystar júrip jatyr. Jumysshylar jetispeidi. Dánekerleýshi, qurylysshy joq. Bul jerde aspaz, bala tárbieleýshi, daiashylar tapshy. Másele sonda. Jumyssyzdyqta emes», - dedi Elbasy.
Osy sebepti Prezident ár aimaqtan 10 kolledjden iriktep, joǵary deńgeige shyǵarýdy júktedi.
«20 JOO men 200-ge tarta jańa kolledjdi aiqyndaý tapsyrmasyn Saǵadiev pen Ábilqasymovaǵa tapsyramyn», - dedi Nursultan Nazarbaev.
Eske sala ketsek, Astanada QR Prezidenti Nursultan Nazarbaevtyń tóraǵalyǵymen Úkimettiń keńeitilgen quramdaǵy otyrysy ótti.
