Nursultan Nazarbaev «Nur Otan» partiiasy Tóraǵasynyń birinshi orynbasary Baýyrjan Baibekti qabyldady, dep habarlaidy "Ult aqparat" Elbasy saityna silteme jasap.
Qazaqstannyń Tuńǵysh Prezidenti – partiia Tóraǵasyna halyqpen keri bailanysty kúsheitý jáne partiia aktivi quramynyń sapasyn jaqsartý boiynsha qabyldanǵan sharalar jóninde, sondai-aq Saiasi keńestiń keńeitilgen otyrysyna daiyndyq barysy týraly baiandaldy.
«2019 jyly partiiaǵa 213 myńnan astam azamat ótinish bildirdi. Bul bir jyl burynǵy kórsetkishten 34 paiyzǵa kóp. Saýalnamalarǵa sáikes, árbir tórtinshi qazaqstandyq másele týyndaǵan jaǵdaida «Nur Otan» partiiasyna júginedi. Sizdiń tapsyrmańyzǵa sáikes óńirlerdi aralaý bastaldy. Ásirese, shalǵaidaǵy eldi mekenderge erekshe nazar aýdaryp otyrmyz. Jýyrda Atyraý oblysynyń Maqat jáne Jylyoi aýdandarynda boldyq», - dedi B.Baibek.
Elbasy azamattardyń máselelerin sheshýde partiianyń belsendi bolýynyń mańyzdylyǵyn aita kele, halyqtyń ómir súrý deńgeiin jaqsartýǵa baǵyttalǵan is-sharalardy júzege asyrý turǵysynan óńirlerdegi infraqurylymdyq damý máselesine toqtaldy.
«Atyraý men Astrahan arasyndaǵy jol qurylysy júrip jatyr. Aqtóbe men Atyraý qalalary arasynda da jol salynady. Iri avtojoldardyń qurylysyn aiaqtaǵannan keiin, oblysishilik joldardyń qurylysyna kirisý qajet. Bul turǵyndar úshin óte mańyzdy», - dedi Nursultan Nazarbaev.
Kezdesý sońynda «Nur Otan» partiiasynyń Tóraǵasy birqatar naqty tapsyrma berdi.
Buǵan deiin habarlaǵanymyzdai, «Nur Otan» partiiasynyń Tóraǵasy - Elbasy Nursultan Nazarbaev 2020 jyldyń 18 naýryzynda partiianyń Saiasi keńesiniń keńeitilgen otyrysyn shaqyrý týraly Qaýlyǵa qol qoidy.
