QR Tuńǵysh Prezidenti Nursultan Nazarbaev osydan 30 jyl buryn álem halqy qaqtyǵystar aiaqtaldy dep úmittengenimen, ol úmit aqtalmaǵanyn aitty, dep habarlaidy "Ult aqparat".
«Reseilik megakontinenttiń ósip kele jatqan kóliktik bailanysy Eýropa men Aziia arasynda adamzat tarihyndaǵy teńdessiz múmkindikterdi ashyp otyr. Dál qazir bizge qaýipti ainalyp ótýge jol ashatyn, Úlken Eýraziia da jańa múmkindikterge qol jetkizetin ashyq ári ádil dialog kerek. Ótken ǵasyrdyń sekseninshi jyldarynyń sońy men toqsanynshy jyldardyń basy dáýirlik oqiǵalarǵa toly boldy. Ol oqiǵalardyń bel ortasynda óz kúireýine bettep kele jatqan SSSR-dyń ydyraýy tur edi. Álem dál osy ýaqytta optimistik kóńil-kúide bolatyn. Qyrǵi-qabaq soǵystyń jarqyn úlgisi retinde Berlin qabyrǵasy qulady. Ol biregei álemdi qurýǵa múmkindik bergen bolatyn. Sol kezde entýziazm tolqynynda Fýkýiamanyń áigili «Tarihtyń aqyry» atty kitaby shyqqan. Álemdik tarih toqtady, adamzat biregei damý jolyna tústi degen qiial paida boldy», - dedi Nursultan Nazarbaev Astana Club otyrysynda.
Elbasynyń aitýynsha, sol ýaqytta álemdik iri qaqtyǵystarǵa núkte qoiyldy degen pikir de aitylǵan.
«Alaida arada 30 jyl ótkende bul úmittiń aqtalmaǵanyn kórip otyrmyz. Búkil álem boiynsha geosaiasi teketiresterge, qaqtyǵystarǵa kýá boldyq. Ótip bara jatqan 2019 jyl da dramaǵa toly jyl bolyp tarihqa enip barady», - dedi ol.
Aita ketsek, elordada QR Tuńǵysh Prezidenti Nursultan Nazarbaevtyń qatysýymen Astana Club otyrysy ótip jatyr. Kezekti basqosýǵa álemniń 23 memleketinen geosaiasat, ekonomika men halyqaralyq qatynastar salasynyń mańdaialdy sarapshysy retinde moiyndalǵan 50-den astam halyqaralyq spiker qatysýda. Qurmetti meimandardyń qatarynda - 3 burynǵy memleket basshysy, 5 eks-premer-ministr, 10 ministr jáne Nobel syilyǵynyń laýreaty bar.
