Memleket basshysy Nursultan Nazarbaev «Nur Otan» partiiasy Saiasi keńesiniń keńeitilgen otyrysynda Ońtústik Qazaqstan oblysynda kámeletke tolmaǵan balanyń atyshýly isi týraly pikir bildirdi.
«Memlekettik qyzmetke laiyqty adamdardyń kelýi jáne laiyqty túrde ilgeriletilýi úshin kez kelgen sýbektivizmdi joiý qajet. Munan basqasha bolmaýy tiis. Jariia túrde de aita alamyn. Keshe Qaýipsizdik Keńesinde de aitqan edim. Ońtústik Qazaqstan oblysynda joǵary synyp oqýshylary balany zorlaǵan. Sonyń tóńireginde qandai áýre-sarsań bastaldy deseńshi. Eshkim taba almady, dáleldei almady. Nege ekenin bilesizder me? Óitkeni tizbektiń barlyq jerinde týǵan-týystary otyrǵan: politsiia, joǵary organ, odan joǵary organda da týǵan-týystar. Barlyǵy da bul isti jabýǵa tyrysyp baqty", - dep atap ótti Memleket basshysy.
Eske salaiyq, OQO-nyń Saryaǵash aýdanyndaǵy Abai aýylynda seksýaldyq zorlyq boldy degen málimet Jelide naýryz aiynda paida bolǵan edi. Al joǵary synyptaǵylar top bolyp zorlady degen kúdikke ilindi. Bul oqiǵa qoǵamda qyzý talqylanǵan bolatyn.
