© "Qazaqstan temir joly" UK" AQ
Naýryz meiramynda 450-den astam týrist "Jibek Joly" jáne "Keruen Express" poiyzdarymen saiahatqa shyqty, dep habarlady "Qazaqstan temir joly" UK" AQ baspasóz qyzmeti.
Naýryz meiramynda 450-den astam jolaýshy "Jibek Joly" jáne "Keruen Express" týristik poiyzdarymen saiahatqa shyqty. Ulttyq tasymaldaýshy iske qosqan bul baǵyttar Qazaqstan men Ózbekstannyń tarihi oryndaryn aralap, Naýryz merekesiniń erekshe kóktemgi atmosferasyn sezinýge múmkindik beredi.
"Jibek Joly" týristik poiyzy Almatydan jolǵa shyǵyp, "Almaty – Túrkistan – Tashkent – Samarqand – Taraz – Almaty" baǵyty boiynsha qozǵalady. Sapar uzaqtyǵy – 6 kún, 2025 jylǵy 20-25 naýryz aralyǵynda ótedi. "Keruen Express" poiyzy da Almatydan shyǵyp, "Almaty – Túrkistan – Tashkent – Samarqand – Almaty" baǵytymen júredi, bul sapar 5 kúnge sozylady: 2025 jyldyń 21-25 naýryz aralyǵy.
Týristik poiyzdar zamanaýi ári jaily otandyq óndiristegi vagondardan jasaqtalǵan. Intereri ulttyq naqyshtaǵy dástúrli oiý-órnek elementterimen bezendirilgen.
Poiyz marshrýttary Qazaqstan men Ózbekstannyń eń iri mádeni jáne tarihi ortalyqtaryn qamtidy. Túrkistanda jolaýshylar IýNESKO tizimine engen Qoja Ahmet Iasaýi kesenesine jáne Uly Jibek jolynyń atmosferasyn beineleitin tarihi Kerýen saraiyna bara alady. Tashkentte týrister Hazrati Imam keshenin, Baraq han medresesin, Abý Bakr Kaffali Shashi men Tóle bi kesenelerin aralap, "Magic City" oiyn-saýyq ortalyǵynda ýaqyt ótkize alady.
Samarqand sapardyń mańyzdy bóligi bolyp tabylady. Munda jolaýshylar Shahi-Zinda keseneler keshenin, Gýr-Emir kesenesin, sondai-aq Registan alańyn tamashalaidy. Bul alańda áigili Sher-Dor, Tillia-Kari jáne Ulyqbek medreseleri ornalasqan. "Jibek Joly" poiyzynyń sońǵy aialdamasy – Taraz qalasy, Qazaqstannyń eń kóne qalalarynyń biri, tarihi jáne sáýlet eskertkishterimen tanymal meken.
