Naýryz aiynda munaidyń álemdik baǵasyna qatysty ońtaily ózgerister bolyp qalady.
Bul jaiynda «Habar-24» telearnasynyń «Raqym Oshaqbaevpen dóńgelek ústel» baǵdarlamasyna suhbat bergen ekonomist Oljas Tóleýov aitty, dep habarlaidy QazAqparat.
Baǵdarlama barysynda R. Oshaqbaev sarapshylardan munai baǵasynyń quldyraýy qanshalyqty uzaq bolatynyn surady.
Óz kezeginde ekonomist Oljas Tóleýov dál qazirgi ýaqytta birshama aiqyndalmaǵan jaǵdailar bar ekenin aitty.
«Málimde (munaiǵa qatysty) jasalǵannan beri az ýaqyt ótti. Qazirgi ýaqytta Resei tarapynan qandai da bir is-qimyldardy kútip otyrmyn. Óitkeni búginde týyndaǵan jaǵdai olarǵa tiimdi emes ekeni anyq. Atap aitqanda, RF tarapy Saýd Arabiiasy osyndai úlken táýkelge baryp, osyndai «baǵa soǵysyn» júrgizetinin kútpegen siiaqty. Resei jáne Saýd Arabiiasy ýáde berip otyrǵan barlyq is-qimyldar júzege asyrylǵan jaǵdaidyń ózinde, bul qadamdar tek 1 sáýirden bastap atqarylatynyn túsiný kerek. Aldaǵy úsh aptanyń barysynda ahýaldy túzetýge tiisti ýaqyt bar dep oilaimyn», - dedi sarapshy.
Onyń sózine qaraǵanda, 18 naýryzda «OPEK+» tehnikalyq komitetiniń otyrysy ótedi, al 1 sáýirge deiin uiym aiasyndaǵy shart resmi kúshinde bolady.
«Meniń oiymsha, osy otyrys aiasynda atalǵan máseleler kóteriledi. Sáikesinshe, aqylǵa qonymdy sheshim bolady dep úmittenemin», - dedi O. Tóleýov.
Eske sala keteiik, QR Úkimeti men QR Ulttyq banki munaidyń álemdik naryqtaǵy jaǵdaiyna jáne makroekonomikalyq turaqtylyqty qamtamasyz etý jónindegi sharalarǵa bailanysty birlesken málimdeme jasady.
«OPEK+ munaidyń negizgi eksporttaýshy elderi arasyndaǵy munai óndirýdi shekteý jónindegi kelispeýshilikter munaidyń álemdik baǵasynyń aitarlyqtai tómendeýine alyp keldi. Búgin, 2020 jylǵy 9 naýryzda Brent markaly munai álemdik naryqtarda 30% astamǵa tómendep, barreline 31-33 dollar kóleminde saýdalanýda. Osy jaǵdaiǵa bailanysty Úkimet pen Ulttyq bank júrgizilip jatqan memlekettik saiasattyń basymdyqtary makroekonomikalyq turaqtylyqty jáne salyq-biýdjet saiasatynyń tiimdiligin qamtamasyz etý, infliatsiialyq protsesterdi basqarý jáne eldegi áleýmettik turaqtylyqty saqtaý bolyp qalatynyn málimdeidi», - delingen taratylǵan habarlamada.
