Almatyda dárigerler segizkóz-quiymshaq tusynda salmaǵy 2 keli bolatyn alyp isigi bar nárestege kúrdeli ota jasap, onyń ómirin saqtap qaldy, dep habarlaidy ult.kz.
Qyz bala tamyzdyń 18-inde salmaǵy 4 keliden asatyn úlken túzilispen dúniege kelgen. Týa bitken isik júktiliktiń 20-aptasynda júrgizilgen skrining kezinde anyqtalǵan.
Náreste týǵannan birneshe saǵattan keiin neonataldyq reanimatologtar men hirýrgterden quralǵan top ony Almaty Balalar shuǵyl meditsinalyq kómek kórsetý ortalyǵyna jetkizdi. Kelesi kúni dárigerler ota jasap, isikti alyp tastady.
Dárigerlerdiń aitýynsha, isik 2 keli bolǵan. Bul náresteniń týǵan kezdegi salmaǵynyń shamamen jartysyna teń. Teratomanyń quramynda súiek, jumsaq tinder jáne kistozdy qýystar bolǵan.
Ota eki saǵattan astam ýaqytqa sozyldy. Hirýrgter isikti alyp tastaǵannan keiin birden plastikalyq qalpyna keltirý operatsiiasyn jasaǵan. Qazir náresteniń jaǵdaiy jaqsy, ol úiine shyǵýǵa daiyndalyp jatyr.
Balanyń anasy júktiliktiń 34-aptasynda kesar tiligi arqyly bosanǵanyn aitty. Onyń sózinshe, bul — tórt uldan keiin kópten kútken qyzy.
Segizkóz-quiymshaq teratomasy — nárestelerde kezdesetin týa bitken isikterdiń biri. Ol ana qursaǵynda qalyptasyp, bala ósken saiyn ulǵaiýy múmkin. Kei jaǵdaida ómirlik mańyzdy aǵzalardyń jumysyna áser etip, aýyr asqynýlarǵa ákeledi.
Jyl basynan beri Almatydaǵy Balalar shuǵyl meditsinalyq kómek kórsetý ortalyǵynyń jańa týǵan náresteler bólimine 96 bala jetkizilgen. Onyń 72-sine hirýrgiialyq em qajet bolǵan.
