Búgin áleýmettik jeli arqyly halyqpen onlain kezdesken Almaty oblysy politsiia departamentiniń bastyǵy, politsiia general-maiory Serik Kúdebaevqa qyzmet barysynda qaza tapqan politsiia polkovnigi Aidyn Asqarbaevtyń anasy qońyraý shaldy, dep habarlaidy QazAqparat.
Almaty oblystyq politsiia departamenti baspasóz qyzmetiniń málimetinshe, bir qylmystyq istiń tergelýine qatysty habarlasqan qart anaǵa kóńil aitqan bas politsei «óz isiniń kásibi sheberi, naǵyz patriot» bala tárbielegeni úshin alǵysyn jetkizdi.
«Politsiia polkovnigi Aidyn Asqarbaev bilikti maman bolatyn. Ártúrli bólimshelerde basshylyq qyzmette bolǵan ol úzdik nátijelerge qol jetkizýshi edi. Ókinishke qarai, qyzmet babynda kólik apatynan qaitys boldy. Biz ony umytpaimyz, qurmet tutamyz!»,- dedi Almaty oblysy politsiia departamentiniń bastyǵy, politsiia general-maiory Serik Kúdebaev.
Esterińizge sala keteiik, Alakól aýdany politsiia bóliminiń bastyǵy Aidyn Asqarbaev 2016 jyly kólik apatynan qaitys bolǵan.
Onyń jarqyn beinesin esten shyǵarmaǵan áriptesteri onyń joldasy Úmitke biyl «Ofitser jubaiy» medalin taqqan.
Qyzmetin atqarý kezinde qaitys bolǵan politseilerdiń otbasyna politsiia departamentiniń tarapynan únemi kóńil bólinetinin atap ótý qajet.
Tikelei efirde tildesken soń politsiia basshysy keiýananyń máselesin óz baqylaýyna alatynyn aityp, qolastyndaǵylarǵa tapsyrma berdi.
