Áigili Nagata esebin sheshken belgili matematik Ýalbai Ómirbaev Túrkistan qalasynda óz mektebin ashady. Bul týraly Túrkistan oblysynyń ákimi Ómirzaq Shókeevpen kezdesýde málim boldy, dep habarlaidy "Ult aqparat" ákimdiktiń saityna silteme jasap.
Basqosýda óńir basshysy QR Memlekettik jáne Amerika matematika qoǵamynyń joǵary dárejeli «Mýr» syilyqtarynyń iegeri Ýalbai Útmahanbetulyna otandyq ǵalym retinde álemdik ǵylymǵa qosqan úlesi úshin alǵys bildirdi.
«Ekonomika, óndiris salalary matematika ǵylymymen tyǵyz bailanysta damidy. Ǵalymdardyń ǵylymi jańalyqtarynyń arqasynda ónim artady. Nagata, Kon syndy áigili matematikterdiń esebin sheshken ózińizdei álemge tanymal ǵalymdardyń elden shyǵyp, álemge kúlli Qazaqstandy tanytyp jatqandyǵy bizdi qýantady. Endi týǵan jerge tý tigip, Túrkistan oblysynda, onyń ishinde Túrkistan qalasynda óz mektebińizdi qalyptastyryp, aýyldan shyqqan talantty balalarymyzdy qoldaýymyz qajet», - dedi Ómirzaq Estaiuly.
Óz kezeginde, sóz alǵan Ýalbai Útmahanbetuly usynysqa qoldaý bildirip, aldaǵy ýaqytta óńir oqýshylaryna udaiy interaktivti júiemen matematika sabaǵyn júrgizetinin aitty. Sondai-aq, ǵalym Túrkistan qalasynan arnaiy joǵary matematikalyq mektep ashýǵa nietti ekendigin jetkizdi.
Ýalbai Ómirbaev - QR UǴA korrespondent múshesi, fizika-matematika ǵylymdarynyń doktory, professor. 1977-1982 jyldary Novosibir memlekettik ýniversitetiniń aspirantýrasynda bilim alǵan. Álemdegi ozyq joǵary oqý oryndarynda dáris oqyp keledi. 1972 jyldan beri sheshimin tappai kele jatqan japon ǵalymy M.Nagatanyń esebin 2001 jyly, aǵylshyn matematigi P.Konnyń esebin 2004 jyly sheshti. Búginde AQSh-ta Detroit shtatynyń Ýein ýniversitetinde dáris beredi.
