Foto: QR Mádeniet jáne aqparat ministrliginiń baspasóz qyzmeti
QR Ulttyq akademiialyq kitaphanasynda memleket qairatkeri, filosofiia ǵylymdarynyń doktory, professor Myrzatai Joldasbekovtiń «Kúnderimniń kýási» atty alty tomdyq kitabynyń tusaýkeser rásimi ótti, dep habarlaidy Ult.kz.
Bul jinaqta 1993-2018 jyldar aralyǵynda jazylǵan kúndelik jazbalary toptastyrylǵan. Avtordyń eńbeginde eldiń tarihi damýy, halyqaralyq qatynastardyń qalyptasýy, mańyzdy saiasi sheshimder qabyldanýy, sondai-aq qazaqtyń mádenieti, ádebieti men óneriniń órkendeýine qosqan úlesteri keńinen baiandalǵan. Sonymen qatar kitapta eldiń áleýmettik-ekonomikalyq ahýaly, ultaralyq qatynas máseleleri, ulttyq tárbie men adamgershilikke qatysty oilar da kórinis tapqan.
Foto: QR Mádeniet jáne aqparat ministrliginiń baspasóz qyzmeti
Is-shara barysynda Mádeniet jáne aqparat ministri Aida Balaevanyń quttyqtaý haty oqyldy. Ministr óz hatynda:
«Bul alty tomdyq eńbek – táýelsiz elimizdiń tarihyn tanyp-bilýge, ulttyq qundylyqtarymyzdy dáripteýge arnalǵan qundy mura. Kitapta halqymyzdyń taǵdyrly kezeńderi men mańyzdy oqiǵalary shynaiy baiandalyp, óskeleń urpaq úshin taǵylymy mol derekkózi bolatynyna senimdimin», – dep atap ótti.
Tanystyrylymǵa belgili qoǵam jáne memleket qairatkerleri, aqyn-jazýshylar, jýrnalister, oqyrmandar men BAQ ókilderi qatysty. Is-shara avtordyń shyǵarmashylyq jolyna qurmet kórsetip, elimizdiń rýhani murasyna qosylǵan taǵy bir mańyzdy eńbekti dáripteýge arnaldy.
