Ekologiia ministrliginiń basshysy jas sarapshylardy ekologiialyq máselelerdi sheshý boiynsha birlesken jumysty kúsheitýge shaqyrdy, dep habarlaidy "Ult aqparat".
Búgin QR ekologiia, geologiia jáne tabiǵi resýrstar ministri Maǵzum Myrzaǵaliev QR Parlamenti Senaty janyndaǵy Jas sarapshylar klýbynyń tórtinshi otyrysyna qatysty.
Talqylaý taqyryby ekologiia, tabiǵi resýrstardy utymdy paidalaný jáne turaqty damý máseleleri boldy.
Jas sarapshylar elimizdiń qalalaryndaǵy aýa sapasy, sý resýrstaryn basqarý, ósimdikter men janýarlardyń sirek kezdesetin jáne joiylyp ketý qaýpi bar túrlerin saqtaý siiaqty ekologiia jáne qorshaǵan ortany qorǵaý salasyndaǵy túrli máselelerdi kóterdi.
Mysaly, Ulttyq biotehnologiia ortalyǵyndaǵy adam genetikasy zerthanasynyń meńgerýshisi, professor Maqsat Jabaǵin bioalýantúrliliktiń ulttyq biobankin qurýdy usyndy.
«Qazaqstannyń florasy men faýnasynyń bioalýantúrliligin saqtaý úshin erekshe qorǵalatyn tabiǵi aýmaqtarmen qatar ǵylymi maqsattar úshin biologiialyq úlgilerdi jinaý, saqtaý, óńdeý jáne taratý jáne utymdy paidalaný jónindegi biryńǵai operator retinde biologiialyq resýrstardyń ulttyq ortalyǵyn nemese Bioalýantúrliliktiń Biobankin qurý qajettiligi pisip-jetildi. Bul ǵylymi zertteý maqsatynda jinalǵan jáne saqtalǵan biologiialyq úlgilerge basqa uiymdardyń ǵylymi toptaryna júginýge múmkindik beredi», - dedi ol.
Tómenkómirtekti damý jónindegi sarapshy, Dornier Consulting konsýltanty Gúljamal Isaeva saiasi sheshimder qabyldaý jáne halyqty habardar etý úshin tsifrlyq taldamalyq platformany ornatý arqyly monitoring stantsiialarynyń jelisin keńeitý qajet dep sanaidy.
Onyń pikirinshe, bul qala aýdandarynda atmosferanyń lastaný deńgeiin onlain rejimde jáne grafikalyq formatta baqylaýǵa múmkindik beredi.
Maǵzum Myrzaǵaliev otyrys barysynda aitylǵan suraqtar men usynystarǵa jaýap bere otyryp, Jas sarapshylar klýbyn ministrliktiń júrgizip jatqan jumysy men bolashaqqa josparlary týraly habardar etti.
«Siz kótergen barlyq másele óte mańyzdy jáne ózekti. Barlyq osy baǵyttar boiynsha biz turaqty negizde monitoring, zertteý júrgizemiz jáne alynǵan derekter negizinde is-qimylymyzdy josparlaimyz. Árine, ekologiia máselelerin birden sheshý múmkin emes. Biraq kezeń-kezeńimen biz tiimdi ózgeristerge qadam basyp kelemiz», - dep atap ótti ministr.
Vedomstvo basshysy jańa ekologiialyq kodekstiń qabyldanýyn, sondai-aq árbir óńir boiynsha Jol kartasyn bekitýdi ekologiialyq saýaldardy sheshýdiń pármendi quraly dep atady.
Sonymen qatar, ázirlenip jatqan «2021-2025 jyldarǵa arnalǵan Jasyl Qazaqstan» ulttyq jobasy týraly da aityldy.
«Qazir biz Sý resýrstaryn basqarý boiynsha ulttyq jobany qurý boiynsha jumys istep jatyrmyz. Joba sý teńgerimin saqtaýǵa, jańa irrigatsiialyq júielerdi salýǵa, sý sharýashylyǵy infraqurylymyn jańǵyrtýǵa múmkindik beredi jáne sý únemdeýge kómektesedi», - dep atap ótti vedomstvo basshysy.
Sonymen qatar, ministr eldi kógaldandyrý sharalary týraly da habarlady.
«Keshendi jospar bekitildi, óńirler boiynsha qoný kólemi anyqtaldy. 2 mlrd aǵash otyrǵyzýdy monitoringteý boiynsha interaktivti karta jasalady. Naýryz meiramynda Memleket basshysynyń atalǵan bastamasyn iske asyrý bastaldy, «Taza tabiǵat» jobasy bastaý aldy. Sondai-aq, aǵash kesý jaýapkershiligin qatańdatý boiynsha zańnamalyq sharalar bekitildi, «Janýarlarǵa jaýapkershilikpen qaraý týraly» zań jobasy Májiliste», - dedi ol.
Maǵzum Myrzaǵaliev sondai-aq jas sarapshylardy tiimdi nátijege qol jetkizý úshin ekologiia máselelerin sheshý salasyndaǵy birlesken jumysty kúsheitýge shaqyrdy.
