Bokstan Qazaqstan Ulttyq quramasynyń bas bapkeri Djakartadaǵy jattyǵýlary týraly aityp berdi, dep habarlaidy QazAqparat tilshisi.
- Myrzaǵali Qulanuly, Djakartanyń aýa raiyna úilesip jatyrsyzdar ma?
- Iá, boksshylar aýa raiyna beiimdelip qaldy. Negizi, boksshylardyń jarysy 24 tamyzda bastalady. Biz Djakartaǵa eki túrli sebeppen erte keldik. Birinshisi, osy jaqtyń aýa raiyna beiimdelý. Al ekinshisi Aziadanyń ashylý saltanatyna qatysý. Sebebi, ashylý rásiminde Qazaqstannyń bairaǵyn bizdiń boksshymyz Ábilhan Amanqul alyp shyǵatyn boldy. Mine, osyndai sebepterge bailanysty erte kelýge týra keldi.
- Jattyǵatyn ortalaryńyz, jatatyn qonaqúilerińiz, iship-jeitin tamaqtaryńyz qalai? Kóńilderińiz tolyp jatyr ma?
- Munda kelgen barlyq sportshylarǵa birdei jaǵdai jasalǵan. Bir eldiń sportshylaryna jaily, bir eldiń sportshylaryna jaisyz qyzmet kórsetý degen joq. Jalpy, jarysty uiymdastyrý qyzmeti kóńilimizden shyqty. Tamaqtary da unady.
- Básekede qai eldiń boksshylary basty qarsylas bolýy múmkin?
- Buiyrsa, tamyzdyń 23 kúni jerebe tartylady. Jerebeden keiin baryp kimderdiń qarsylas bolatynyn biletin bolamyz. Ázirge, qarsylastar týraly aitý erterek.
- Jalpy, jarysqa daiyndyqtaryńyz qalai bolyp jatyr?
- Daiyndyǵymyz óte keremet. Boksshylar da kóterińki kóńil-kúide júr. Eń bastysy, jeńiske degen senim men úmit bar. Bizden jeńis kútińizder, jeńisti kúnderde jolyǵaiyq.
- Áńgimeńizge rahmet!
