Dimash Qudaibergen elordada jańadan ashylǵan teatrdyń alǵashqy qoiylymynyń mýzykalyq keńesshisi boldy. Al teatrdyń akterlik quramynda 71-shi Kann halyqaralyq kinofestivaliniń jeńimpazy Samal Esliamova da bar, dep habarlaidy "Ult aqparat".
Qazaqstan Respýblikasynyń Táýelsizdigi Kúni qarsańynda jáne halqymyzdyń uly aqyny ári oishyly Abai Qunanbaiulynyń 175 jyldyǵy aiasynda Nur-Sultan qalasy ákimdiginiń Mýzykalyq jas kórermen teatry 2020 jyldyń 14 jeltoqsanynda 19:00-deM.Áýezovtiń «Abai–Toǵjan» mýzykalyq dramasymen saltanatty túrde tuńǵysh maýsymyn ashqaly otyr.
Mýzykalyq jas kórermen teatrynyń jumysy jas urpaqtyń boiyna rýhani qundylyqtardy darytyp, otandyq jáne álemdik mýzykalyq qoiylymdardy sahnalaý arqyly balalar men jasóspirimderdiń mádeni-estetikalyq álemin, tanym-taǵylymyn, shyǵarmashylyq áleýetin jetildirýge baǵyttalǵan.
Teatrdyń direktory – Qazaqstannyń eńbek sińirgen qairatkeri, filosofiia doktory Ashat Maemirov.
Óner ordasy óz jumysyn 2020 jyldyń 1 qazanynda bastap ketti. 28-30 qyrkúiek kúnderi aralyǵynda kasting uiymdastyrylyp, 50-den astam daryndy ártis tańdap alyndy. Teatrdyń akterlik quramynda Qazaqstannyń eńbek sińirgen qairatkeri, 71-shi Kann halyqaralyq kinofestivaliniń jeńimpazy Samal Esliamova, «Daryn» Memlekettik jastar syilyǵynyń laýreattary Aian Ótepbergen, Asylhan Tólepov, Ádilhan Makin jáne Rasýl Ýsmanov, t.b. jas artister bar.
Qazaqstannyń teatr keńistiginde tuńǵysh ret sahnalanyp otyrǵan «Abai–Toǵjan» mýzykalyq dramasy – jasóspirimderdiń júrek qylyn shertip, oi-armandaryn asqaqtatyp, sanasyna serpin berip, jigerin qairap, ishki mádenieti men rýhani jan-dúniesin baiytyp, eldik sezimi biik ulaǵatty urpaqty tárbieleý jolynda eleýli úles qosýdy murat tutady.
Adamzat tarihyndaǵy birtýar tulǵalardyń bolmys-bitimindegi jasampaz rýh – balalyq shaqtan bastaý alady. «Abai-Toǵjan» mýzykalyq dramasy – búginge deiingi uly aqyn jaily qoiylǵan shyǵarmalardan bolmysy bólek, beinesi erek jańa týyndy. Balalar men jasóspirimderdiń dúnietanymyna, talǵamyna, rýhani bolmysynyń qalyptasýyna áser etetin bul qoiylym Abai ǵumyrynyń bozbala kezeńinen kórinis beredi.
Jas Abaidyń júreginde oianǵan alǵashqy mahabbaty, kókireginde týǵan tuńǵysh jyry áýezdi ánge ainalyp, ishki sezim tebirenisterin alasapyran kúige salady. Toǵjanǵa degen ińkár sezim – ómirge degen qushtarlyqqa ulasyp, Abaidyń adamzatqa degen asqaq mahabbatynyń temirqazyǵyna ainaldy. Qunanbaidai ákeniń ónegesi, Uljandai ananyń tárbiesi, qorshaǵan ortanyń tylsym syry, ǵashyqtyqtyń ǵalamaty, dos pen baýyrdyń qadiri jas kórermenniń janyna rýhani lázzat syilap, sanasyna kórkem kózqaras qalyptastyrýǵa yqpal etedi. Abai poeziiasyndaǵy oily jyrlar men esti ánder oryndalatyn qoiylymda ulttymyzdyń qundylyqtary sahna biigine kóteriledi. Halyqtyq sana, ulttyq tárbie, babalar dástúri, uly dala ulaǵaty – ǵashyq Abaidyń jan súzgisinen ótip, jas sýretkerdi «Súiesiń júrek, kúiesiń» degen uǵymdaryna qarai jetelei beredi. Jas Abaidyń álemi – kórermenge «Ǵashyqtyń tili – tilsiz til» ekendigin uqtyrady.
Qoiylymnyń premerasy 14, 15, 16 jeltoqsan kúnderi ótedi. Instsenirovka avtory – Miras Ábil, rejisseri – Ashat Maemirov, mýzykalyq keńesshi – Dimash Qudaibergen, qoiýshy-sýretshi – Alma Syrbaeva, kompozitory – Baýyrjan Aqtaev, baletmeisteri – Shyryn Mustafina, hormeisteri – Ǵalymjan Berekeshev.
