Ulttyq jobalar aiasynda 50 óńirlik oqý ornynyń IT-fakýltetteri beiindi IT-ýniversitetterge nemese qalyptasyp úlgergen IT-kompaniialardyń qamqorlyǵyna beriledi. Bul týraly QR Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin aityp berdi, dep habarlaidy QazAqparat.
«Bárimiz jaqsy túsinip otyrmyz, qazir IT salasy úshin JOO-lar daiarlaityn mamandardyń deńgeii asa joǵary emes – iaǵni JOO-lar sapasy tómen mamandardy berip otyr. Bul da bizdiń ortaq problemamyz. Sondyqtan biz Bilim jáne ǵylym ministrligimen birlesip, 50 óńirlik JOO-nyń IT-fakýltetterin beiindi IT-ýniversitetterge nemese qalyptasyp úlgergen IT-kompaniialardyń qamqorlyǵyna berý jumystaryn júrgizetin bolamyz», - dedi ministr Ortalyq kommýnikatsiialar qyzmetinde ótken baspasóz máslihatynda.
Sonymen birge ministr IT startapshylar úshin «retteýshi ortanyń» bolýy mańyzdy ekenin jetkizdi.
«Mysaly, startapshy pitstsany dronmen jetkizgisi kelse, bul úshin elimizde zańnama bazasy joq. Nemese bireý avtonomdy kólikti esh júrgizýshisiz synap kórgisi keledi. Oǵan da Qazaqstanda zańnama negizi joq. Mundai tehnologiialardy synaqtan ótkizý úshin belgili bir aýmaqta «retteýshi orta» qurý qajet. Sol aýmaqta mundai jańa tehnologiialardy qoldanýǵa bolady jáne startaptar óz jańalyqtarymen jumys istei alady», - dep túsindirdi Mýsin.
Aita keteiik, Memleket basshysynyń Joldaýy aiasynda «Tsifrlandyrý, ǵylam jáne innovatsiialar esebinen tehnologiialyq serpilis» ulttyq jobasy ázirlenip, bekitildi. Ulttyq joba 10 baǵyttan, 226 tapsyrmadan, 44 kórsetkishten jáne 211 is-sharadan turady, olardy iske asyrý 2025 jylǵa deiin josparlanǵan.
Ulttyq joba aiasynda halyqqa qyzmet kórsetý ortalyqtary da tsifrlyq jáne videoqyzmetterin iske qosady. Qazaqstannyń barlyq balalary informatika jáne baǵdarlamalaý boiynsha sapaly bilim alýy úshin «Virtýaldy informatika muǵalimi» jobasy iske asyrylmaq.
Sonymen birge, ulttyq jobalar aiasynda halyqqa IT daǵdylaryn tegin úiretetin 20 innovatsiialyq mektep ashylady.
