Senattyń jalpy otyrysynda depýtat Murat Baqtiiaruly elimizdiń Premer-Ministriniń atyna joldaǵan depýtattyq saýalynda Qyzylorda oblysyndaǵy sý tapshylyǵy máselesin kóterdi, dep habarlaidy QazAqparat.
Depýtattyń aitýynsha, Qyzylorda oblysynyń áleýmettik-ekonomikalyq jaǵdaiy Syrdariia ózeni basseinin sýmen qamtamasyz etýge jáne sýarmaly jerlerdiń melioratsiialyq jaǵdaiyna tikelei bailanysty. Oblys transshekaralyq ózenniń tómengi aǵysynda ornalasqan, sondyqtan onyń joǵarǵy aǵysynan keletin sý kólemine táýeldi.
Osyǵan bailanysty Syrdariia ózeniniń joǵarǵy aǵysynda ornalasqan memleketterge sý táýeldiliginiń tómendeýi óńir úshin óte mańyzdy bolyp otyr. Depýtattyń pikirinshe, Qaraózek jáne Kúmisketken sý qoimalaryn salý bul máseleni sheshýge kómektesedi.
«2022 jylǵa arnalǵan respýblikalyq biýdjettiń parametrlerinde Kúmisketken sý qoimasyna ári Qaraózek sý qoimasynyń qurylysyn bastaýǵa 500 mln teńge qarjy qarastyrylýyna jáne sonymen qatar 30 myń gektar sýarmaly egistik jerlerin sýmen qamtamasyz etý maqsatynda, Ekologiia, geologiia jáne tabiǵi resýrstar ministrliginiń «Qazsýshar» RMK sý jetkizip berý qyzmeti esebinen Qyzylorda oblysy Jańaqorǵan aýdanynda sý tospasyn qaita salýǵa yqpal jasaýyńyzdy suraimyn»,- dedi depýtat.
