Memleket basshysy Qasym-Jomart Toqaev Eýropalyq keńestiń prezidenti Sharl Mishelmen beinebailanys rejiminde ekijaqty kelissóz júrgizdi. Virtýaldy kezdesý eýropalyq taraptyń bastamasymen ótti, dep habarlaidy "Ult aqparat" Aqordaǵa silteme jasap.
Ózara dostyq pen senimge negizdelgen áńgimelesý barysynda taraptar Qazaqstandaǵy qazirgi ishki saiasi ahýaldy jáne Qazaqstan men Eýropalyq Odaq arasyndaǵy strategiialyq seriktestiktiń damý perspektivalaryn talqylady.
Sharl Misheldiń ótinishi boiynsha Qasym-Jomart Toqaev elimizdegi qazirgi oqiǵalardyń sebepteri men qabyldanyp jatqan memlekettik sharalar jóninde málimet berdi. Prezident konstitýtsiialyq qurylysqa nuqsan keltirip, memlekettik tóńkeris jasaýǵa umtylǵan terrorister men buzaqylardyń zorlyq-zombylyq áreketteri týraly aitty.
Prezident bolǵan qaiǵyly oqiǵalardy asa aýyr agressiialyq akt jáne memlekettiligimizge jasalǵan qastandyq dep atady. Sondai-aq lańkesterdiń zorlyq áreketteri saldarynan kóptegen quqyq qorǵaý qyzmetkerileri men beibit turǵyndardyń qurban bolǵanyn, 1300-ge jýyq kásipkerlik nysanǵa zalal kelgenin, 100-den astam saýda ortalyǵy men bankterdiń tonalǵanyn, 500-ge jýyq politsiia mashinasy órtengenin aitty. Qasym-Jomart Toqaevtyń baǵalaýynsha, memlekettiń aldyn ala ekonomikalyq shyǵyny 2-3 milliard AQSh dollaryn quraidy.
– Munyń terrorlyq shabýyl ekenine eshqandai kúmánim joq. Bul – Qazaqstanǵa qarsy jaqsy uiymdasqan, ábden daiyndalǵan agressiialyq akt. Shabýyl jasaǵandardyń ishinde basym kópshiligi - Ortalyq Aziia elderinen, onyń ishinde Aýǵanstannan kelgen sheteldik sodyrlar. Sonymen qatar arasynda Taiaý Shyǵystan kelgen sodyrlar da bar. Olardyń piǵyly bizdiń aýmaqty baqylaýda ustaityn haos aimaǵyna ainaldyrý, sodan keiin bilikti basyp alý boldy. Sondyqtan Qazaqstanda lańkestikke qarsy operatsiia bastaldy, – Memleket basshysy.
Qasym-Jomart Toqaev el aýmaǵyna UQShU-nyń bitimgerlik kúshteri quramynyń ornalastyrylýy jóninde naqty túsindirme jasady.
– Bitimgerlik kúshteri áskeri operatsiialarǵa qatyspaitynyn ashyp aitqym keledi. Olardyń negizgi mindeti – Almaty qalasy men Qazaqstan astanasyndaǵy strategiialyq nysandardy qorǵaý. Bul qazaqstandyq kúshtik qurylymdardyń lańkesterge qarsy is-qimyldaryn júzege asyrýyna múmkindik beredi. UQShU-nyń bitimgerlik kúshteri UQShU Ujymdyq qaýipsizdik týraly sharttyń 2-shi jáne 4-shi baptaryna sáikes ornalastyryldy. Olar Qazaqstandaǵy jaǵdai tolyq turaqtanǵansha bolady, – dedi Qazaqstan Prezidenti.
Memleket basshysy Qazaqstan óziniń halyqaralyq mindettemelerin saqtaýǵa beiil ekenin atap ótip, Eýropalyq Odaqtyń institýttarymen jáne oǵan múshe memlekettermen aradaǵy yntymaqtastyqty odan ári damytýǵa daiyndyǵyn naqtylady.
Qasym-Jomart Toqaevtyń málimetin muqiiat tyńdaǵan Sharl Mishel elimizdegi sońǵy oqiǵalar týraly egjei-tegjeili bilýge múmkindik bergen osy virtýaldy kezdesýdiń zor paidasy bolǵanyn aitty. Ol Qazaqstandaǵy oqiǵalarǵa qatysty ártúrli túsindirmelerden góri osylai shynaiy aqparat alýdyń mańyzdy ekenine toqtaldy.
– Biz Sizdiń elińizdiń egemendigi men aýmaqtyq tutastyǵyn qoldaimyz. Qazaqstanmen aradaǵy yntymaqtastyqty odan ári nyǵaitýǵa daiynbyz, – dedi Eropalyq keńestiń prezidenti.
Kelissóz qorytyndysy boiynsha taraptar syrtqy qurylymdar deńgeiinde turaqty bailanys jasap turýǵa ýaǵdalasty.
