- «QazMunaiGaz Ónimderi» JShS baspasóz qyzmeti «QazMunaiGaz» janarmai beketterindegi Ai-92 markaly benzininiń qymbattaýyna qatysty pikir bildirdi, dep habarlaidy Ult.kz tilshisi QazAqparat agenttigine silteme jasap.
Kompaniianyń málimdeýinshe, jańa kóterme baǵamen alynǵan benzin satylymǵa shyǵarylǵandyqtan, «QazMunaiGaz» janarmai beketterindegi baǵa qymbattaǵan.
«Baǵany memlekettik retteý toqtatylǵan soń, kóterme baǵa men RF import quny baǵa túziliminiń negizgi faktory bolady. QR jalpy tutynatyn benzinniń 30%-y Reseiden importtalady. Ekinshi toqsannan bastap, munai ónimderiniń kóterme baǵasy qymbattady. «QazMunaiGaz Ónimderi» JShS áleýmettik-baǵdarlyq baǵa saiasatyna súienip, tómen baǵamen aldyn ala jinaqtaǵan qoryn satylymǵa shyǵardy. Qor taýarlary satylyp bitti, endi jańa kóterme baǵamen alynǵan janarmai qymbattyraq baǵamen satylady», - delingen «QazMunaiGaz Ónimderi» JShS tilshi saýalyna bergen jaýabynda.
Sonymen qatar, kompaniia «QazMunaiGaz» janarmai beketterindegi baǵanyń áli de naryqtyq baǵadan tómen ekenin atap ótti. «Bólshek saýda quny kóterme baǵamen tikelei bailanysty. Ázirge kóterme baǵa turaqtaldy, bólshek saýda quny da jaqyn arada bir qalypqa túsedi», - delingen habarlamada.
Sondai-aq, «QazMunaiGaz Ónimderi» JShS «QazMunaiGaz» janarmai beketterindegi benzin kólemi týraly áńgimeledi. «Ótken jylǵy kezeńmen salystyrǵanda, AI-92 satý kólemi 30% artqan. Suranystyń kóbeigenin eskere otyryp, tutynýshylar qajettiligin qanaǵattandyrý úshin QMGÓ janar-jaǵarmai materialdaryn ulǵaitý týraly ótinim berdi, osylaisha qordy turaqtandyrý múmkindigi paida boldy», - dedi kompaniia.
Buǵan deiin Astanadaǵy «QazMunaiGaz» janarmai beketterinde Ai-92 markaly janarmaidyń qymbattaǵany habarlanǵan edi. Suranysqa ie otyn Astana men Qazaqstannyń ózge qalalarynda 5 teńgege qymbattaǵan. Endi onyń 1 litri 128 teńge emes, 133 teńgeni quraidy. QMG janarmai beketterindegi Ai-95 benzininiń litri 145 teńgeden satylyp jatyr.
