Atyraý oblysynda kógaldandyrýǵa bailanysty 10 jyldyq joba ázirlendi, dep habarlaidy "Ult aqparat".
Bul týraly oblys ákiminiń orynbasary Erjan Ábilhanovtyń tóraǵalyǵymen qorshaǵan ortaǵa ziiandy lastaýshy zattar shyǵaratyn iri kásiporyn basshylarynyń qatysýymen ótken jiynda belgili boldy. Keńes Atyraý qalasyn kógaldandyrý máselesine arnaldy.
E.Ábilhanovtyń aitýynsha, bul joba QR Prezidenti Qasym-Jomart Toqaevtyń eldi jappai kógaldandyrý týraly tapsyrmasyna orai qolǵa alynǵan.
«Atyraý oblysy ákimdigi atalǵan tapsyrmany iske asyrý maqsatynda Atyraý qalasy men onyń ainalasynda aǵash otyrǵyzý boiynsha 10 jyl júzege asyrylatyn irgeli joba daiyndady. Bul, kógaldandyrýǵa arnalǵan ýchaskelerdi, jaýapty oryndaýshyny jáne aǵash otyrǵyzý kestesin aiqyndaýdy kózdeidi», - dedi Erjan Ábilhanov.
Atalǵan jobany júzege asyrýǵa investitsiia qajet. Osyǵan orai oblysta aýaǵa negizgi qaldyq shyǵarýshylar – munai-gaz óndirý jáne munai óńdeý kásiporyndaryn tartý kózdelip otyr. «Lastaýshy qalpyna keltiredi» qaǵidasyna sáikes TShO, NCOC, «Embimunaigaz», Atyraý munai óńdeý zaýyty jáne basqalary negizgi kásiporyndar retinde anyqtalǵan. Atalǵan kásiporyndarǵa kógaldandyrý jáne 3-5 jyl boiy alǵashqy kútim jasaý úshin ýchaskeler bekitilmek. Bul ýchaskeler qalaǵa nemese orman sharýashylyǵyna beriledi.
Jiynǵa qatysýshylardyń aitýynsha, osy jyldyń qazan-qarasha ailarynda qalanyń ózinde alǵashqy aǵashtar otyrǵyzylady. Al kelesi jyldan bastap Atyraýdyń ainalasynda «jasyl beldeý» qurý bastalady. Oblystyń orman sharýashylyǵynyń oblysta ósirilgen, Atyraýdyń qatal klimatyna beiimdelgen kóshettermen qamtamasyz etýge áleýeti jetedi.
TShO, NCOC, Atyraý munai óńdeý zaýyty, «Embimunaigaz» jáne ózge de kompaniia ókilderi jobaǵa qatysatynyn rastady. Al bir-eki aptadan keiin memorandýmǵa qol qoiylyp, jumys bastalady.
«Bul jobany iske asyrý aimaqtaǵy ekologiialyq ahýaldy jaqsartady. Qala turǵyndary úshin jańadan demalalys jáne serýendeitin oryndar paida bolady. Sondai-aq kóp uzamai biz tek «Atyraý» emes, «Jasyl Atyraý» dep aitatyn kúnge jetemiz dep oilaimyn», - dedi oblys ákiminiń orynbasary Erjan Ábilhanov.
