2021 jyly Qazaqstannyń 15 óńirinde múgedektigi bar adamdarǵa túrli kómek kórsetý úshin «Ten Qogam» ortalyqtary ashylady. Bul týraly QR Eńbek jáne halyqty áleýmettik qorǵaý ministrliginiń keńeitilgen alqa májilisinde vedomstvo basshysy Serik Shápkenov aitty, dep habarlaidy QazAqparat.
Ministr óz sózinde Qazaqstanda 695 myńnan astam múgedektigi bar adam turatynyn atap ótti, onyń ishinde 419,8 myńy eńbekke qabiletti jasta (60%), 180,6 myńy zeinetkerlik jasta (26%), 94,7 myńy - 18 jasqa deiingi bala (14%).
2020 jyly múgedektigi bar adamdardy áleýmettik qorǵaýǵa memlekettik biýdjetten 448 mlrd teńge bólindi, bul 2019 jylmen salystyrǵanda 10,4 paiyzǵa artyq.
Múgedektigi bar adamdardyń quqyqtaryn qamtamasyz etý jáne ómir súrý sapasyn jaqsartý jónindegi jumys tirshilik áreketiniń barlyq baǵyttaryn qamtityn Ulttyq jospar aiasynda júrgiziledi. Qujat 7 baǵyt boiynsha 64 is-sharany qamtidy: múgedektiktiń profilaktikasy jáne onyń aldyn alý, bilimge qoljetimdilik, kedergisiz orta, ekonomikalyq jumyspen qamtý, tiimdi ońaltý, áleýmettik qyzmetter jáne qoǵamdyq sanany jańǵyrtý.
«2020 jyldyń qorytyndysy boiynsha 343,4 myńnan astam múgedektigi bar adam nemese muqtajdardyń 81 paiyzy qajetti tehnikalyq quraldarmen (OTQ) jáne ońaltý qyzmetterimen qamtamasyz etildi. OTQ qamtamasyz etýdi jaqsartý úshin ótken jyly Áleýmettik qyzmetter portaly iske qosyldy (aleumet.egov.kz), ol arqyly azamattar óz betinshe, memlekettik satyp alýlarsyz ońaltýdyń qajetti quraldary men qyzmetterin tańdap, satyp ala alady», – dedi S. Shapkenov.
2020 jyly portalda jeke irikteýdi talap etpeitin OTQ-nyń 55 túriniń 24-in satyp alý múmkindigi iske asyryldy. 28,8 myń ońaltýdyń tehnikalyq quraly berildi. 2021 jyldyń 1 qańtarynan bastap OTQ-nyń 55 túri qoljetimdi boldy. Sondai-aq Portal arqyly jeke kómekshiniń, ymdaý tili mamanynyń qyzmetterine jáne sanatorlyq-kýrorttyq emdelýge tapsyrys berýge bolady.
Ekonomikalyq belsendilik úshin múmkindikter jasaý maqsatynda 2020 jyly múgedektigi bar adamdarǵa arnalǵan kásipter atlasy ázirlendi. Bul anyqtamalyq múgedek adamdardy jumysqa ornalastyrý kezinde, onyń ishinde elektrondyq eńbek birjasy portalynda jumys izdeýdi jetildirý úshin paidalanylatyn bolady (enbek.kz). Usynylatyn mamandyqtar QR Ulttyq kásipter synyptaýyshyna negizdelgen. 12 myńnan astam kásip zerdelendi, nátijesinde múgedektiktiń 1-toby úshin 2,5 myńǵa jýyq kásip usynyldy, 2 jáne 3-toptar úshin jeke-jeke 7 myńǵa jýyq kásip usynyldy.
Múgedektigi bar adamdardyń ómir súrý sapasyn qamtamasyz etý maqsatynda 2021 jyly Múgedekterdiń quqyqtary týraly konventsiiaǵa Fakýltativtik hattamany ratifikatsiialaý týraly zań jobasy ázirlenetin bolady.
«Aqmola, Aqtóbe jáne Qaraǵandy oblystarynda múgedektigi bar balalarǵa arnalǵan jańa ońaltý ortalyqtaryn ashý kózdelgen. 15 óńirde «Ten Qogam» ortalyqtary ashylady. Nur-Sultan men Almatyda mundai ortalyqtar qazirdiń ózinde tabysty jumys isteýde, olarda múgedektigi bar adamdarǵa psihologiialyq jáne quqyqtyq kómek, jumysqa ornalasýǵa járdem kórsetiledi. Ortalyqtardy ashý «Nur Otan» partiiasynyń jańa baǵdarlamasyn iske asyrý jónindegi jol kartasynda kózdelgen. Ákimdikter atalǵan sharalardyń oryndalýyn qamtamasyz etýi qajet», – dedi vedomstvo basshysy.
Serik Shápkenov sondai-aq qoljetimdi ortany qamtamasyz etý bóliginde jyl saiyn 4 myńnan astam nysandy beiimdeý boiynsha mindet qoiylǵanyn habarlady. Biyl beiimdelgen, standarttarǵa sáikes keletin nysandardyń úlesi 20 paiyzdy quraýǵa, al 2025 jyly 100 paiyzǵa jetýge tiis.
«2020 jyly Ulttyq jospar aiasynda Ministrlik múgedektigi bar adamdardyń quqyqtary men áleýmettik qoldaý alýyn qamtamasyz etýge baǵyttalǵan «Qazaqstan Respýblikasynyń keibir zańnamalyq aktilerine azamattardyń jekelegen sanattaryn áleýmettik qorǵaý máseleleri boiynsha ózgerister men tolyqtyrýlar engizý týraly» zań jobasyn ázirledi.
