Elordada muqtaj otbasylarǵa kómek kórsetý jeleýimen aqsha jinady degen kúdikpen 21 jastaǵy alaiaq boijetken ustaldy, dep habarlaidy "Ult aqparat" Polisia.kz-ke silteme jasap.
Kúdikti buǵan deiin QR Qylmystyq kodeksiniń 189-babymen qylmystyq jaýapkershilikke tartylǵan. Tergeý barysynda ustalǵan boijetkenniń 2019 jyldyń qańtarynan beri internet jelisin paidalanýshylarǵa qatysty birneshe ret alaiaqtyq jasaǵany belgili bolyp otyr. Máselen, ol Instagram áleýmettik jelisinde az qamtylǵan otbasylarǵa aqsha jinaý jáne qaiyrymdylyq kórsetý jeleýimen «komissionka_nursultan» dep atalatyn paraqsha ashqan. Atalǵan paraqshaǵa jazylǵandardyń biri boijetkenniń áreketinen kúdiktengen.
«Muqtaj otbasylarǵa kómek kórsetýdi sheshken ol boijetkenniń banktik kartasyna 20 500 teńge aqsha aýdarǵan. Zardap shegýshiniń aitýynsha, biraz ýaqyt ótkennen keiin onyń áreketinen kúdiktene bastaǵan. Kómek kórsetý úshin muqtaj otbasylarmen kezdestirý ótinishine túrli syltaý aityp, keiinnen bailanysqa múldem shyqpai qoiǵan. Ózin aldap ketkenin túsingen zardap shegýshi politsiiaǵa júgingen», - delingen taratylǵan aqparatta.
Ustalǵan kúdikti alaiaqtyq jasaǵanyn moiyndap otyr. Qazirgi ýaqytta onyń ústinen QR QK 190-baby 2-bóligi boiynsha 10 epizodpen sotqa deiingi tergeý amaldary júrgizilip jatyr. Keltirilgen jalpy shyǵyn – 400 myń teńge.
Osyǵan orai Nur-Sultan qalasynyń Politsiia departamenti atalǵan qyzdyń alaiaqtyq áreketinen zardap sheken azamattardy Beibitshilik kóshesi, 19 mekenjaiyna kelýge nemese 8 (7172) 41-63-35, 71-67-08 telefon nómirlerine habarlasýǵa ótinish jasap otyr.
