BUU Bas Assambleiasynyń 76-shy sessiiasy sheńberinde Niý-Iorkte QR Premer-Ministriniń orynbasary – Syrtqy ister ministri Muhtar Tileýberdi, AQSh Memlekettik hatshysy Entoni Blinken, Qyrǵyzstannyń Syrtqy ister ministri Rýslan Kazakbaev, Tájikstannyń Syrtqy ister ministri Sirodjiddin Mýhriddin, Túrikmenstannyń Syrtqy ister ministri Rashid Meredov jáne Ózbekstannyń Syrtqy ister ministri Abdýlaziz Kamilovtyń qatysýymen «S5+1» ministrlik kezdesýi ótti. Bul týraly SIM baspasóz qyzmeti habarlady.
Syrtqy saiasi vedomstvolardyń basshylary Aýǵanstandaǵy daǵdarysty jaǵdaidy sheshýde, óńir memleketteriniń COVID-19-ǵa qarsy is-qimyl boiynsha kúsh-jigerin biriktirýdegi, ekonomikalyq ózara bailanystylyq salasyndaǵy múmkindikterdi iske asyrýdaǵy jáne klimattyq daǵdarysqa qarsy kúrestegi zor áleýetin atap ótip, «S5+1» óńirlik diplomatiialyq platformasynyń mańyzdylyǵyn rastady. Elden ketkisi keletin sheteldik azamattar men aýǵandyqtardyń qaýipsizdigin qamtamasyz etýdiń jáne Aýǵanstannyń inkliýzivti úkimetin qalyptastyrýdyń mańyzdylyǵyn atap ótti.
Qazaqstan SIM basshysy «S5+1» ózin óńirlik qaýipsizdikti talqylaýdyń, Ortalyq Aziia óńiri ishindegi jáne AQSh-ta ózara tiimdi bailanystardy arttyrýdyń turaqty alańy retinde tanytty» dep málimdedi.
Sondai-aq, kezdesýge qatysýshylar Qazaqstannyń «S5+1» elderiniń tabiǵat qorǵaý vedomstvolary basshylarynyń kezdesýin shaqyrý jónindegi bastamasynyń der kezinde uiymdastyrylǵanyn, olardyń praktikalyq qorytyndylary ekonomikalyq ósýdiń qozǵaýshy kúshi bola alatynyn atap ótip, óńirlik energetikalyq bailanystar men energiia tiimdiligi jaqsarǵan múmkindikterdi atap ótti.
«S5+1» kezdesýi Ortalyq Aziiadaǵy jańa syn-qaterler men qaýipterdi, ekologiialyq problemalardy sheshý jónindegi birlesken sharalardy, sondai-aq óńirlik tásildi talap etetin saýda-investitsiialyq bailanystardy keńeitý joldaryn talqylaýǵa múmkindik berdi.
Sondai-aq, M.Tileýberdi AQSh Memlekettik hatshysynyń Ońtústik jáne Ortalyq Aziia isteri jónindegi kómekshisi Donald Lý jáne AQSh Ulttyq qaýipsizdik keńesiniń Resei jáne Ortalyq Aziia boiynsha keńsesiniń Aǵa direktory Erik Grinmen kezdesti.
Kelissózder barysynda ekijaqty, óńirlik jáne halyqaralyq kún tártibindegi keń aýqymdy máseleler, sonyń ishinde asa joǵary jáne joǵary deńgeidegi bailanystar, Aýǵanstandaǵy aǵymdaǵy jaǵdai jáne aýǵanaralyq dialogty ilgeriletý jáne t.b. máseleler talqylandy.
