QR Prezident ákimshiligi basshysynyń birinshi orynbasary Dáýren Abaev «Ashyq dialog 2» suhbatynyń kezekti sanynda Prezident Joldaýynda aitylǵan jańa Áleýmettik kodekstiń mańyzyna toqtaldy, dep habarlaidy QazAqparat.
«Prezident áskerge barý mamandyq alýdyń taǵy bir múmkindigi bolý kerektigin aitty. Bul da óte mańyzdy tezis dep oilaimyn. Óitkeni shuǵyl áskeri qyzmetkerlerdi daiarlaý isine tyńǵylyqty qaraýǵa jol ashady. Negizinde bul jerde azamattyq qyzmettiń keibir elementterin kirgizý týraly aitylyp otyr. Ásker qatarynan bosaǵannan keiin azamattar tek qana saptyq, jaýyngerlik qabiletterdi ǵana emes, bazalyq, kásibi qabyletterdi meńgerip, azamattyq ómirde jumysqa ornalasa alýy kerek. Bizde mektepten keiin memlekettiń nazarynan tys qalatyn adamdar bar. Bálkim sabaq úlgeriminiń nasharlyǵynan joǵary oqý ornyna túse almaityn shyǵar. Olardy kóp jaǵdaida jumysqa da almaidy. Óitkeni joǵary bilimi men jumys tájiribesi joq degen siiaqty. Ondai jandarǵa ne isteý kerek? Ne qylmysqa aralasady, ne masyldyqqa tap bolady. Kezdeisoq tabystarǵa arqa súiep kúneltýi múmkin. Osy tusta armiia áleýmettik turǵyda óz múmkindigińdi iske asyrýdyń jaqsy baspaldaǵy bola alady. Árine, bul áleýetti paidalaný kerek», - dedi Prezident ákimshiligi basshysynyń birinshi orynbasary.
Onyń sózine qaraǵanda, Prezident Joldaý arqyly jetkizgisi kelgen taǵy bir mańyzdy messedj – jańa Áleýmettik kodeks áleýmettik baǵdarlamalardy sanaly túrde paidalaný kerektigi týraly aitqany.
«Áńgime ne týraly bolyp otyr? Mysaly, óńirlerdegi ahýaldyń monitoringteri keide múgedek múshesi bar otbasylar, ókinishke qarai, ol adamnyń saýyǵýyna múddeli emes ekenin kórsetken. Mundai jaittar kezdesip jatyr. Nege? Óitkeni ol áleýmettik kiris pen jeńildiktiń mańyzdy kózi. Múgedektik rásimdeý áleýmettik turǵyda «tartymdy» iske ainalyp barady. Bul máseleniń ádep jaǵyn qozǵaǵym kelip otyrǵan joq. Árine, ómirde túrli jaǵdai bolady. Áleýmettik qorǵaý júiesi adamdy jumysqa ornalasýǵa, oqýǵa, áleýmettik ómirge belsendi kirisýge yntalandyrmaityny óz aldyna bólek másele», - degen spiker buǵan deiin atamlysh másele eń ońai jolmen rettelip kelgenin eske aldy.
«Dóreki estiletin shyǵar, biraq biz ondai azamattardyń problemasynan áleýmettik kómek arqyly jaltarǵymyz keledi. Al basqa elderde, Eýropa elderinde áleýmettik qoldaýdyń jumysqa ornalastyrý, oqytý siiaqty basqa formalary qoldanylady. Iaǵni, Prezident bul jerde memleket áleýmettik kómekti qaiyrymdylyq printsipteriniń negizinde emes, áleýmettik ádildik pritsipteriniń negizinde qurýdy usynady. Meniń oiymsha, kóptegen múgedekter buǵan da muqtaj. Bul da joǵary quzyrettilikti qajet etetin kúrdeli mindet. Biraq problema bar eken, ony sheshý mindeti de týyndaidy. Prezident Joldaýynda osy máseleni qozǵady», - dedi Dáýren Abaev.
