Qazir Qazaqstanda jańartylǵan baǵdarlamamen sabaq beretin 205 myń muǵalimniń jalaqysy 30 protsentke kóbeigen. Bul týraly bilim jáne ǵylym vitse-ministri Ashat Aimaǵambetov aitty, dep habarlaidy Sputnik Qazaqstan tilshisi.
Úkimette ótken baspasóz máslihatynda vitse-ministr qazaqstandyq muǵalimderdiń ortasha ailyǵy qansha ekenin aitýǵa qinaldy. Sebebi ustazdardyń jalaqysyn kóterý degen kezde, eki máselege mán bergen jón deidi.
"Birinshisi, jańartylǵan baǵdarlama boiynsha jumys isteitin muǵalimderge jalaqy kóterý. Qazir 205 myń muǵalimniń jalaqysyna 30 protsent ústemaqy qosyldy. Tiisti qarjy respýblikalyq biýdjetten bólinip, jergilikti biýdjetterge berildi. Ekinshisi, muǵalimderdiń sanatyna qarai tólenetin ústemaqy. Sizder bilesizder, biyl jańa attestatsiialaý júiesi engizildi. Soǵan sáikes, attestatsiiany sátti tapsyrǵan ustazdarǵa sanatyna bailanysty ústemaqy qosylady. Sondyqtan qazir muǵalimderdiń ortasha ailyǵy qansha ekenin aitý qiyn", — dep túsindirdi ol.
Aimaǵambetovtiń aitýynsha, aýylda jumys isteitin muǵalimderge qosymsha taǵy 25 protsent ústemaqy tólenedi.
"Eger biz buryn, ústemaqy 17 myń desek, endi qazir jańartylǵan baǵdarlama boiynsha sabaq beretinderge 30 protsent ústemaqy tólenedi. Ol muǵalimniń sanaty ártúrli bolýy múmkin, tiisinshe jalaqyǵa qosylatyn 30 protsent te ártúrli bolady. Aýyldyq eldi mekende jumys istese, oǵan taǵy 25 potsent qosylady. Sondyqtan bul jerde sharttary ártúrli", — dedi vitse-ministr.
