Qazaqstandyqtar WhatsApp messendjerinde jańa jyldan bastap pedagogtardyń eńbekaqysy qysqaratyny týraly aqparat taratqan. Habarlamada 30 paiyz kólemindegi jańartylǵan baǵdarlama boiynsha sabaq bergeni úshin qosymsha tólemder alynyp tastalatyny aitylǵan. Bul aqpardy QR Bilim jáne ǵylym ministrligi joqqa shyǵardy.
«Áleýmettik jelilerde jańa jyldan bastap pedagogterdiń eńbekaqysy qysqaratyny týraly jalǵan aqparat tarady. Habarlamada eńbekaqynyń 25% óskenine qaramastan, jańartylǵan baǵdarlama boiynsha sabaq bergeni úshin 30% teń qosymsha tólemder alynyp tastalatyny aitylǵan. Demek, muǵalimderdiń tabysy 5% tómendeidi. Bul - jalǵan aqparat. Jańartylǵan bilim berý mazmuny úshin qosymsha aqy burynǵydai tólenedi. Sonymen qatar, kelesi jyldyń qańtar aiynan bastap Memleket basshysy Q.Toqaevtyń tapsyrmasy boiynsha pedagogtardyń eńbekaqysy taǵy 25% kóteriletinin eske salamyz. Aita keteiin, 2020 jyly pedagogtardyń eńbekaqysy 25%, 2021 jyly taǵy 25% ósti. Budan bólek, Prezidenttiń qoldaýynyń arqasynda, biliktilik sanaty úshin qosymsha aqy 30-50% deiin ulǵaityldy» dep jazdy Facebook paraqshasynda vedomstvonyń baspasóz hatshysy Móldir Ábdýalieva.
Onyń aitýynsha, muǵalimderge dápter tekserý jáne synyp jetekshiligi úshin ústemeaqy eki ese arttyrylǵan, sondai-aq tálimgerlik úshin qosymsha aqy tóleý syndy jańa sanat paida bolǵan.
«El Prezidentiniń tapsyrmasy boiynsha Bilim jáne ǵylym ministrligi pedagogtardyń eńbegin yntalandyrý maqsatynda júieli jumys júrgizýde. Barlyq sharalar bilim berý uiymdaryn bilikti kadrlarmen qamtamasyz etýge baǵyttalǵan. Pedagogikalyq baǵyttar boiynsha oqytýdyń tartymdylyǵyn arttyrý úshin osy mamandyqtar boiynsha bilim alyp júrgen stýdentterdiń shákirtaqysy biyl qyrkúiek aiynan bastap 42 myń teńgege deiin kóterildi. Jelide taraǵan qaýesetterge seńbeńizder» dep eskertedi ministrlik ókili.
