Semeide pedagogterdi kóshe sypyrýǵa jibergen laýazymdy tulǵalar ákimshilik jaýapqa tartyldy, dep habarlaidy "Ult aqparat" Bilim jáne ǵylym ministrliginiń baspasóz qyzmetine silteme jasap.
Áńgime Semei qalasy ákiminiń orynbasary D.A. Garikov týraly bolyp otyr. Sonymen birge ákimniń orynbasaryna qatysty tártiptik sharalar qoldaný týraly hat joldandy.
Semei qalasy bilim bóliminiń basshysy N.A. Fesenkoǵa qatysty sógis túrinde tártiptik jaza qoldanyldy. Sondai-aq ol ákimshilik jazaǵa tartyldy.
№ 9 OM direktory N.V. Tegai jáne №43 OM direktorynyń m. a. A.V. Iskrina ákimshilik jaýapqa tartyldy.
Esterińizge sala keteiik, áleýmettik jelilerde 16 qazanda Semei qalasynyń №43 mektebinde oqý protsesine kedergi keltirip, muǵalimderdi senbilikke kóshe sypyrýǵa jibergeni týraly jariialanymdar taraǵan bolatyn.
Pedagogterdi qyzmetinen tys jumystarǵa tartý, onyń ústine oqý protsesine kedergi keltirý «Pedagog mártebesi týraly» Zań talaptaryna qaishy keledi.
QR BǴM Bilim jáne ǵylym salasynda sapany qamtamasyz etý komitetiniń, sondai-aq ShQO Bilim salasynda sapany qamtamasyz etý departamentiniń qyzmetkerleri ákimshilik isti qarady.
Tekserý barysynda senbilikke №43 mektebiniń pedagogterinen basqa №9 mektebiniń muǵalimderi de jiberilgeni anyqtaldy.
Ákimshilik isti qaraý barysynda pedagogter qalany abattandyrý jumystaryna Semei qalasy ákiminiń orynbasary D.A. Garikovtyń haty negizinde shyqqany anyqtaldy. Hatta pedagogterdiń senbilikke tańǵy saǵat 09.00-de shyǵýyn qamtamasyz etý tapsyrylǵan. Sondai-aq hattyń ákim orynbasarynyń qoly qoiylǵan qosymshasyna sáikes ár mektepke aýmaqty tazartý jumystaryn júrgizý úshin belgili bir ýchaske berilgen. Tapsyrmanyń oryndalýyn baqylaý ákimdiktegi bólimshelerdiń birine júktelgen.
«Bilim jáne ǵylym ministrligi oblystar men respýblikalyq mańyzy bar qalalardyń ákimdikterine pedagogterdi paidalaný jáne olardy qyzmetinen tys jumystarǵa tartý boiynsha osyndai áreketterge jol berilmeýi tiis ekendigi týraly túsindirilgen hat joldady», - delingen habarlamada.
