Muǵalimderdi artyq jumystarǵa tartqandyǵy úshin tiisti aiyppuldar bolady. Osylaisha, pedagogtarǵa qatysty shamadan tys júkteme azaitylmaq. Bul týraly Parlament Májilisinde «Pedagog mártebesi týraly» zań jobasynyń tanystyrylymynan keiin QR Bilim jáne ǵylym ministri Ashat Aimaǵambetov aitty, dep habarlaidy "Ult aqparat".
«Memleket basshysy muǵalimderdi kerek emes ártúrli jumystarǵa tartýǵa tosqaýyl qoiý máselesin kóterdi. Bul rette qaptaǵan esepter men artyq jumystar barshylyq. Sondyqtan bul baǵytta tiisti sharalardy atqaramyz. Zań jobasynda qajetti sanktsiialar qarastyryldy», - dedi ministr.
Belgili bolǵandai, muǵalimderdi olarǵa qatysy joq jumystarǵa tartqany úshin jáne artyq eseptilikke jekkeni úshin 20-dan 120 AEK-ke deiin aiyppul qarastyrylǵan. Sonymen qatar, osyndai aiyppul jumys ýaqytynyń normasyn zańsyz asyrǵany úshin de eskerilgen.
«Bul sharalar óziniń úlken septigin tigizedi dep oilaimyn. Mysaly, direktorlar, ákimdikter jáne basqa memlekettik organdarǵa qatysty. Búginde mektepke kimder kelmeidi? Tekserýshi organdar da az emes. Kerek emes ártúrli aqparat surasa, muǵalimderdi jumysyna tán emes sharalarǵa tartatyn bolsa, onda tiisti jaza qoldanýǵa múmkindik týdy. Zań jobasy qabyldanǵannan keiin biraz jaqsy ózgerister bolady dep sanaimyn», - dedi A. Aimaǵambetov.
