Parlament Májilisinde «Pedagog mártebesi týraly» jáne «Qazaqstan Respýblikasynyń keibir zańnamalyq aktilerine pedagog mártebesi, muǵalim men oqýshyǵa júktemeni tómendetý máseleleri boiynsha ózgerister men tolyqtyrýlar engizý týraly» zań jobalarynyń tanystyrylymy ótti, dep habarlaidy QazAqparat.
«Muǵalimderge qatysty materialdyq emes yntalandyrý sharalary qarastyrylǵan. Birinshi kezekte balabaqshadan oryn berý máselesi eskerilgen. Sonymen qatar, «Qazaqstannyń eńbek sińirgen ustazy» memlekettik marapatynyń jańa túrin engizý de bar», - dedi QR Bilim jáne ǵylym ministri Ashat Aimaǵambetov.
Onyń sózine qaraǵanda, áskeri qyzmetke shaqyrýdy keiinge qaldyrý usynysy da nazarǵa alynyp otyr.
«Aýyldyq jerde jumys isteitin muǵalimderdi eńbekaqysyn arttyrý, «Úzdik pedagog», «JOO-nyń úzdik oqytýshysy» granttary siiaqty qoldanystaǵy barlyq áleýmettik kepildikter de mindetti túrde zań jobasynda saqtaldy», - dedi A. Aimaǵambetov.
Sonymen qatar, ol Memleket basshysynyń tapsyrmasy aiasynda aldaǵy tórt jylda muǵalimderdiń eńbekaqysyn eki esege arttyrý kózdelgenin eske saldy. Aldaǵy jyldan bastap pedagogtardyń jalaqysy 25 paiyzǵa ósedi.
