Bul týraly Úkimettiń baspasóz ortalyǵynda ótken baspasóz konferentsiiasynda bilim jáne ǵylym vitse-ministri Ashat Aimaǵambetov málimdedi, dep habarlaidy Baq.kz aqparat agenttigi.
Eske sala keteiik, búgin QR Úkimetiniń otyrysynda Bilim jáne ǵylym ministri Erlan Saǵadiev qyrkúiek aiynan bastap jańartylǵan bilim berý mazmunyna kóshetin 3, 6, 8 synyptarǵa oqýlyqtar satyp alý úshin 28,6 mlrd tg bólingenin aitty. Ministrlik oqýlyqtardyń jetkizilýine kún saiyn monitoring júrgizýde.
Óz kezeginde vitse-ministr Ashat Aimaǵambetov BAQ ókilderiniń suraqtaryna jaýap bere otyryp, elimizde búginde oqýlyqtardy jetkizý boiynsha belsendi naýqan júrgizilip jatqanyn aitty. Jalpy, jańa oqý jylyna daiyndyq kezindegi eń basty máselelerdiń biri — mektepterdi qajetti materialdarmen qamtamasyz etý. Oqýlyqtardy jetkizý qarqyny jaman emes. Búgingi kúni oqýlyqtardyń 91% jetkizilgen. Osy aptanyń sońyna deiin bul kórsetkishti 100%-ǵa jetkizý kózdelgen.
Sondai-aq, A. Aimaǵambetov Astanada oqýlyqtardy ýaqytyly jetkizbeý máselesi sheshilgenin aitty. Bir apta ishinde munda oqýlyqtardyń 50% jetkizildi. Osy aptanyń sońyna deiin qalǵan bóligin jetkizý josparlanǵan.
Budan ózge, Bilim jáne ǵylym ministrliginde muǵalimder toltyrýy tiisti bes qujat anyqtalǵan.
«Biyl Ministrlikte muǵalimder toltyrýy tiisti tek bes qujat anyqtalǵan buiryq qabyldandy. Bul: kúntizbelik-taqyryptyq jospar, ár sabaqtyń jospary, kriteriilik baǵalaý, kúndelik jáne synyp jýrnaly», — dedi A. Aimaǵambetov.
Sonymen qatar, vitse-ministr basqa qujattardy toltyrýǵa qatań tyiym salynǵanyn jáne QR BǴM buny qadaǵalaitynyn atap ótti.
«Eger mektep direktory, bilim berý basqarmasy basqa qujattardy toltyrýdy talap etse, Bilim jáne ǵylym ministrliginiń baqylaý departamentine júginýge bolady. Biz shara qabyldaimyz», — dedi A. Aimaǵambetov.
Esterińizde bolsa, vitse-ministr biyl jyl sońyna deiin 72 jańa mekteptiń paidalanýǵa beriletini týraly aitqan bolatyn.
