"Pedagog mártebesi týraly" zań jobasynda ustazdardy zeinetke erte jiberý, jeńildetilgen ipoteka berý usynystary qarastyrylmaǵan. Bul týraly búgin májiliste zań jobasyn tanystyrý barysynda belgili boldy, dep habarlaidy Sputnik Qazaqstan.
"Pedagog mártebesi týraly" zań jobasyn ázirleý barysynda qoǵam tarapynan muǵalimderdi eńbek ótiline qarap, zeinetke erte shyǵarý týraly usynys túsken edi. Alaida, bilim jáne ǵylym ministri Ashat Aimaǵambetovtiń aitýynsha, bul usynys qoldaý tappaǵan.
"Zeinetaqy shotynda belgili bir jinaǵy bar azamattar úshin zeinetke erte shyǵý múmkindigi qarastyrylǵanyn bilesizder. Al muǵalimderge qatysty aitar bolsam, bireýleri 20 jyldan keiin, endi biri 35 jyldan keiin zeinetke shyǵarý kerek deidi. Bir-birine qarama-qaishy pikirler aitylýda. Qazirgi zań jobasynda mundai norma qarastyrylmaǵan", - dedi ol.
Ministrliktiń aqparatyna súiensek, biýdjet múmkindigin eskere otyryp, birqatar usynys múddeli memlekettik organdarda kelisimnen ótpei qalǵan. Zeinetke erte shyǵý, eki eselengen kólemde saýyqtyrý járdemaqysyn tóleý, pedagogtarǵa arnalǵan jeńildetilgen ipoteka, dotsent jáne professor ataqtary úshin qosymsha aqy, pedagogikalyq mamandyqtar boiynsha bilim alatyn stýdentterge joǵary stipendiia tóleý sekildi usynystar solardyń qatarynda.
