Áleýmettik meditsinalyq saqtandyrý qory Qarjy ministrligimen birlesip halyqqa qyzmet kórsetetin emdeý mekemelerin irikteý protsesin avtomattandyryp jatyr. Bul týraly ońtústik astanada meditsinalyq saqtandyrý máseleleri jónindegi aimaqtyq shtab otyrysynda «Áleýmettik meditsinalyq saqtandyrý qory» KEAQ basqarma tóraǵasy Aibatyr Jumaǵulov málimdedi.
«Qarjylandyrý kólemi artqannan keiin meditsina uiymdarynan túsetin ótinishter men kelisimsharttar sany da eki ese kóbeiedi. Sondyqtan biz satyp alý protsesin de jetildirip jatyrmyz. Biylǵy jyldyń úshinshi toqsanynda qyzmet kórsetetin kompaniialar bazasyn jasaý, konkýrsqa qatysýǵa ótinish berý, satyp alý protsedýrasy, jetkizýshilerdi irikteý komissiialarynyń jumysy da tolyǵymen avtomattandyrylady. Bul jumystyń bári elektrondy satyp alýlar portaly arqyly onlain rejimde júrgiziledi», - dedi Aibatyr Jumaǵulov.
Aitýynsha, memlekettik tapsyrys sheńberinde satyp alynatyn qyzmetterdi emdeý mekemeleri arasynda bóliske salý jumystarynyń nátijesi densaýlyq saqtaý salasyndaǵy tólem júielerine jiberiledi. Sodan keiin Qor men jetkizýshiler arasynda kelisimshart bekitiledi. Bul ózgeristerdiń bári de meditsinalyq qyzmetterdi satyp alý protsesiniń ashyqtyǵyn, tiimdiligin qamtamasyz etpek.
«Qazirdiń ózinde Qorda kelisimsharttar men qosymsha kelisimder avtomatty túrde qalyptastyrý fýnktsiiasy iske qosylǵan. Osy tamyz aiynda qujattardyń bir bóligine tsifrlyq qoltańbanyń kómegimen qol qoiýǵa múmkindik alamyz», dep qorytty MSQ basshysy.
