Almaty turǵyny Evgenii Muhamedjanov elektrondy úkimet portalynda óziniń karantindik statsionarǵa jatyp-shyqqany týraly málimetti kórip, Feisbýk áleýmettik jelisinde post jariialaǵan bolatyn.
Aitýynsha, azamat jubaiy ekeýi kovidpen aýyrmaǵan jáne 2021 jyldyń qańtar aiynda eshbir em qabyldamaǵan.
Meditsinalyq saqtandyrý qory atalǵan shaǵym negizinde jan-jaqty saraptama júrgizdi.
Aqparattyq júielerdegi derekke súiensek, 24 qańtarda shetelden kelgen Evgenii Muqamedjanov pen onyń jubaiy «Astana Inter Otel» qonaq úiine ornalastyrylyp, COVID-19 infektsiiasyna test tapsyrǵan.
QR Bas sanitarlyq dárigeriniń 2020 jyly 23 qazandaǵy qaýlysy boiynsha, shetelden kelgen azamattar COVID-19 infektsiiasyna PTsR-analiz tapsyrmaǵan bolsa, 2 táýlikke deiin karantindik statsionarǵa jatqyzylýy tiis. Muqamedjanovtar da osy tártip boiynsha karantinge jatqyzylǵan, bul qyzmet aqparattyq júiege «Aýrýǵa kúdik týyndaýyna bailanysty baqylaý júrgizý» degen ataýmen engizilgen.
«Astana Inter Otel» qonaq úii COVID-19 juqtyrǵan jáne koronavirýstyń aldyn alýǵa qatysatyn densaýlyq saqtaý nysandary men meditsinalyq emes uiymdar tizimine engen. Buǵan «Almaty Qoǵamdyq densaýlyq basqarmasy men Sanitarlyq-epidemiologiialyq baqylaý komitetiniń Almaty departamenti arasyndaǵy kelisim negiz bolyp otyr.
Meditsinalyq saqtandyrý qorynyń málimetinshe, COVID-19 infektsiiasyn emdeý, aldyn alý sharalarynyń aqysy juqpaly aýrýlar profili boiynsha litsenziiasy bar emdeý mekemeleri arqyly tólenedi. Sondyqtan atalǵan azamatqa kórsetilgen qyzmet «Izatima Jekenova atyndaǵy qalalyq klinikalyq juqpaly aýrýlar aýrýhanasy» arqyly tólengen.
Saraptama barysynda shaǵymdanýshynyń karantindik statsionarǵa jatqyzylǵany rastaldy. Oǵan qosa, shetelden oralǵan azamattardy ornalastyrýmen ainalysqan meditsina uiymy tiisti derekterdi aqparattyq júiege kesh engizgen. Bul másele Qoǵamdyq densaýlyq basqarmasyna habarlandy, aldaǵy ýaqytta jaýapty mamandarǵa shara qoldanylýy tiis.
Esterińizge sala ketsek, klinikalar meditsinalyq qyzmet kórsetildi dep jalǵan aqpar tirkegen jaǵdaida Qordyń 1406 biryńǵai bailanys ortalyǵy men Qoldau 24/7 mobildi qosymshasy arqyly shaǵymdanýǵa bolady.
2020 jyly Áleýmettik meditsinalyq saqtandyrý qorynyń mamandary meditsinalyq qyzmetterdiń sapasy men kólemi boiynsha 1,2 millionnan asa kemshilikti anyqtaǵany týraly habarlanǵanyn eske salamyz.
Monitoring kórsetkendei, eń kóp taralǵan buzýshylyq (60%) - bul kómek kóleminiń jasandy ósýi. Kelesi kezekte – esep qujattaryn qate toltyrý – bul barlyq jaittyń 15%-y, al emdeý jáne diagnostika sharalaryn oryndaý barysynda standarttar men klinikalyq protokoldardan negizsiz aýytqý – 9,6%. Sondai-aq, naýqastardyń diagnozyn jasandy qiyndatý, aýrýhanaǵa jatqyzbaý nemese meditsinalyq kómek kórsetpeý, qyzmetter men dári-dármekterdi «berildi» dep jalǵan toltyrý jaittary kezdesedi.
2020 jyldyń qorytyndysy boiynsha ÁSMQ 21 myńnan astam qyzmettiń shyn máninde oryndalmaǵanyn anyqtady, olardyń jalpy quny 290,9 mln teńgege (ekonomikalyq sharalardy eskergende) jetedi. Onyń ishinde ambýlatoriialyq-poliklinikalyq kómek, keńes berý jáne diagnostika qyzmetteri deńgeiinde - 167 mln teńge somaǵa 20 122 kemshilik.
Biyl Qor sapany baqylaý júiesine ózgerister engizýdi josparlap otyr. Meditsinalyq qyzmetterdi kórsetý tártibi men patsientterdiń quqyǵyn buzýǵa ákep soǵatyn jaǵdailar men sebepterdi anyqtaý jáne aldyn alýǵa baǵyttalǵan proaktivti monitoring engiziledi.
