Almaty taýlaryndaǵy muzdyq kólderge áýeden sholý jasaldy, dep habarlaidy "Ult aqparat".
Tótenshe jaǵdai departamentiniń málimetinshe, Almaty taýlaryndaǵy morenaldyq kólderdiń jaǵdaiyn jan-jaqty baǵalaý maqsatynda «Qazseldenqorǵaý» memlekettik mekemesi men Almaty qalalyq Tótenshe jaǵdailar departamentiniń basshylyǵy aerovizýaldyq tekserý júrgizdi.
Jalpy Almaty qalasynyń aýmaǵynda barlyǵy 45 morena kóli bar, onyń ishinde 15 kól qaýipti bolyp sanalady
Tekserý nátijeleri boiynsha, muzdyq morenaldyq kólder qysqy rejimnen shyǵyp jatyr. Kólderge az kólemde sý tolýda, sý deńgeii eń tómengi mólsherde.
«Úlken Almaty ózeni basseinindegi №13 kólde sifon qubyrlary arqyly sý bosatylady. Olar sý deńgeii kóterilgen kezde avtomatty túrde iske qosylady. Aǵymdaǵy jyly morenalyq kólderdi bosatýdyń aldyn alý jumystary Qarǵaly, Aqsai, Kishi jáne Úlken Almaty ózenderiniń basseinderinde ornalasqan jarylýǵa qaýipti 7 morena kóline josparlanǵan. Oǵan respýblikalyq biýjetten 39 million teńge bólindi. Jarylýǵa qaýipti bolyp sanalatyn morenalyq kólderge aldyn alý jumystary 15 maýsymnan bastalady. Olardy iske asyrý úshin joǵary qýattylyqtaǵy 9 sorǵy, 10 turǵyn úi modýli, sifon qubyrlary jáne basqa da qajetti tehnikalyq resýrstar ázirlendi»,– dep habarlaidy qalalyq TJD baspasóz qyzmetinen.
Departamentiń málimetinshe, ótken jyly sel paida bolǵan Qarǵaly ózeni basseinindegi №1 kólde sý mólsheri tómengi deńgeide bolǵandyqtan, qaýip týdyrmaidy. Biyl atalǵan basseinge sý aǵatyn arna salynady, oǵan 14 million teńge qarastyrylǵan.
«Sonymen qatar, aǵymdaǵy jyly Kishi jáne Úlken Almaty, Qarǵaly jáne Aqsai ózenderi basseinderinde sel qaýiptiligin baqylaityn avtomattandyrylǵan júie qurylysynyń 2-shi kezeńi bastaldy. Byltyr birinshi kezeńde 10 stansa salyndy. Al biyl taǵy 21 stansany iske qosý josparda»,– delingen vedomstvo aqparatynda.
Qazirgi ýaqytta jaǵdai turaqty, «Qazseldenqorǵaý» memlekettik mekemesi jáne Almaty qalasynyń Tótenshe jaǵdailar departamentiniń mamandarymen sel jaǵdaiy men morena-muzdyq keshenderi turaqty qadaǵalanyp otyrady.
