Túrki akademiiasy halyqaralyq uiymynyń (TWESCO) bastamasymen Mońǵoliiadaǵy kóne túrkilerdiń «Shiveet ýlaan» ǵuryptyq kesheninde bastalǵan arheologiialyq qazba jumystary jalǵasyp jatyr, dep habarlaidy "Ult aqparat" uiymnyń resmi saityna silteme jasap.
Aldyn ala habarlaǵandai, bul Mońǵoliia Ulttyq Ǵylym akademiiasy janyndaǵy Tarih, arheologiia institýtymen birlesip júzege asqan joba.
Shilde aiynyń basynda TWESCO prezidenti D.Qydyráliniń basshylyǵyndaǵy joba aiasynda belgili mońǵol arheology D.Tsevendorj ben qazaqstandyq túrkitanýshy-ǵalym N.Bázilhannyń jetekshiligimen bastalǵan qazba jumystary búginde Shiveet ýlaannyń negizgi alańynda júrip jatyr. Máńgitas turǵan tuǵyrdyń orny men keshenniń eki bosaǵasynyń alańy da qazyldy. Arheologtardyń jumysy nátijesiz emes. Atap aitqanda, kóne túrkilerdiń músinderi tabyldy. Budan bólek, úiindi tastardan arshylyp, keshenniń qurylymy, irgetasy, irgetasynyń pishini men kólemi anyqtalyp otyr.
Osy jáne ózge de jańalyqtar Akademiianyń uiymdastyrýymen 24 tamyz kúni «Shiveet ýlaan» ǵuryptyq kesheninde ótetin «Uly dala kóshpelileri: tarihi-mádeni úndestikter» atty II túrki-mońǵol arheologtarynyń dala seminarynda keńirek tanystyrylatyn bolady. Bul dala seminary Ázerbaijan, Qazaqstan, Qyrǵyzstan, Mońǵoliia, Resei jáne Túrkiia ǵalymdary men baspasóz ókilderiniń qatysýymen 2016 jylǵy 20-27 tamyzda ótetin «Táńirtaýdan Ótúkenge deiin: Uly dala kóshpendileriniń tarihi-mádeni qazynalary» atty halyqaralyq ekspeditsiia aiasynda uiymdastyrylady.
Nazarlaryńyzǵa keshenniń qurylymyn anyqtaý kezinde túsirilgen birneshe sýretterdi usynamyz.
Ult portaly
