Prezident tapsyrǵan daǵdarysqa qarsy is-sharalar tolyq oryndalýy tiis. Memleket basshysy Qasym-Jomart Toqaevtyń daǵdarysqa qarsy is-sharalar jónindegi málimdemesine orai jazýshy, «Densaýlyq» jýrnalynyń bas redaktory Moldahmet Qanaz osyndai pikir bildirdi.
«Búgingi el basyna túsken jaǵdai – ońai sharýa emes. Juqpaly aýrý adamdy, qyzmetińdi, dárejeńdi tańdamaidy. Virýs múmkindiginshe kóp taraýǵa tyrysady, virýstyń tabiǵaty solai. Onyń qaýpi kózge kórinbeidi, emi – qiyn. Eń jamany – bul virýstyń vaktsinasy tabylǵan joq, sol sebepti biraz áýre-sarsańǵa salýy múmkin. Men de úlken kisi, osy eldiń azamaty esebinde halyqqa janym ashidy. Qazaq halqy – salǵyrttaý, «Bir Qudai aman alyp qalar», «Úkimet óltirmeidi ǵoi» dep júre beredi. Osy salǵyrttyq bizge ziian bolýy múmkin», - deidi jazýshy.
Onyń paiymynsha, qazirgi kúni dert qarqynyn báseńdetip keledi. Al buǵan memleket tarapynan bolǵan qamqorlyq, der kezinde qabyldaǵan sharalar óz septigin tigizip otyr.
«Keshe Prezidentimiz Qasym-Jomart Toqaev bul máseleni qaita qarap, taǵy birsypyra qosymsha sharalar tapsyrdy. Onyń tapsyrmalary júzege asatyny sózsiz. Prezident málimdemesinde halyqtyń basy-qasynda júrgen dárigerlerge qamqorlyq erekshe bolatynyna nazar aýdardy. Bul – óte oryndy, durys sheshim. Olardyń da otbasy, óz ómiri bar. Buryn qoǵamnyń dárigerlerge degen renishi bolyp turatyn. Osy joly dárigerler shyndyǵynda otansúigishtik, patriottyq minez tanytyp otyr. Dárigerlerge sený kerek jáne kómek kórsetý kerek», - deidi ol.
Sonymen qatar, Moldahmet Qanaz qosymsha shara retinde Prezident sheshimin qoldaitynyn bildirdi.
«Qarjy – halyqtyń qazynasy. Memleket basshysynyń halyqtyń óz qazynasyn ózine jumsaǵany óte oryndy. Prezident Qasym-Jomart Toqaevtyń bul sheshimin qoldaitynym sózsiz. Jalpy bundai jaǵdaida aýyzbirshilik, túsinistik kerek, aitylǵan tapsyrmalar tolyq oryndalýy tiis», - deidi ol.
Sóz sońynda jýrnaldyń bas redaktor salaýatty ómir salty, buqaranyń saýlyǵy týraly toqtala kele, bul baǵytta BAQ kóterer júgi jeńil emes ekenin atap ótti.
«Densaýlyq – zor bailyq» degendi bári aitady. «Saqtansań – saqtaidy» degen áńgime de burynnan kele jatyr. Densaýlyq saqtaýdyń eń negizgi printsipteriniń biri – aldyn alý, qamdaný, salamatty ómir súrý. Osy mańyzdy baǵytty dáriptep, nasihattap júrgen «Densaýlyq» jýrnaly týraly da sóz qosa ketkim keledi. Osydan 25 jyl buryn elimizde 200 myń danamen taraǵan ana tilimizdegi jalǵyz jýrnal osy bolatyn. Bul jýrnalǵa memleket tarapynan qoldaý bolsa deimin. Halyq óz densaýlyǵy týraly naǵyz mamandardan shynaiy aqparatty bilip, oqyp, odan oi túiip otyrýy kerek. Myna indet te densaýlyq pen aqparat salasyndaǵy saiasatqa jaqsy ózgerister ákeledi dep úmittenemin», - deidi Moldahmet Qanaz.
