2017 jyldyń 1-5 naýryzy aralyǵynda Túrkiianyń Izmir qalasynda "MODEKO-2017" halyqaralyq jihaz kórmesi ótedi. Biyl 28-ret ótkizilgeli otyrǵan sharanyń basty demeýshileri: Túrkiia Respýblikasy ekonomika ministrligi, Izmir ákimdigi, Ege aimaqtyq kásipkerler palatasy, Izmir Saýda palatasy t.b.
Kórme barysynda álemniń 32 elinen keletin 1200-ge jýyq qatysýshy 5 kún boiy álemdik standartqa sáikes jihaz shyǵaratyn izmirlik kásiporyndarmen tikelei bailanys ornatýǵa múmkindik alady.
Halyqaralyq naryqta túrikterdiń jihazy sapasy jaǵynan úlken suranysqa ie. MODEKO-2017 kórmesinde klassikalyq, avangard, modern jáne modýldyq stildegi jihazdyń qonaqúi, asúi, balalar men jasóspirimder bólmesi, jatyn bólmege arnalǵan túrleri usynylady. Jumsaq jihazben qatar oryndyq, ústel, shkaftyń da túr-túri satyp alýshylardyń kóńilinen shyǵary anyq.
CSIL zertteý kompaniiasynyń derekterine súiensek, Túrkiia jihaz eksporty jaǵynan álemdik naryqtyń 2 paiyzyn iemdenedi. 2003-2011 jyldar aralyǵynda Túrkiianyń jihaz ónerkásibi 292 paiyzǵa ósken. Túrkiianyń Jihaz assotsiatsiiasy túrik jihazshylary aldaǵy 2-3 jylda álemniń úzdik ondyǵyna enýdi kózdep otyr. Búginde túrik ónimi Irak, Germaniia, Iran, Ázirbaijan, Frantsiia, Túrkimenstan, Niderlandtar, Resei, Saýd Araviiasy men Italiiaǵa eksporttalady. Al byltyr MODEKO-2016 jihaz kórmesine Shvetsiia, Gollandiia, Grýziia, Katar, Oman, Izrail t.b. jalpy sany 32 memleketten satyp alýshy qatysqan.
Izmir – kólemi jaǵynan alǵanda, Túrkiianyń alǵashqy úshtigine enetin qala. Stambuldan keiingi asa mańyzdy port ta Izmirde ornalasqan. 8500 jyldyq tarihy bar ásem qalanyń týrizm salasy da kúshti damyǵan. Tabiǵaty tamasha Izmirde tarihi muraǵa arnalǵan mekender kóp. Shipaly termaldy sý, ystyq bulaqtar, jaǵajailar, ózindik ashanasymen erekshelenetin qalada halyqaralyq deńgeidegi kórme, festival, jármeńkeler jii ótkiziledi.
"Ult aqparat"
