Ózbekstan Prezidenti epidemiologiialyq ahýaldyń órship turǵanyna bailanysty halyqty belsendi túrde vaktsina alýǵa shaqyrdy. Bul týraly el Prezidenti Shavkat Mirziioevtyń tóraǵalyǵymen ótken beineselektorlyq jinalystyń qorytyndysynda aityldy, dep habaralaidy "Ult aqparat".
«Meni álemniń jetekshi ǵalymdarynyń zertteýi qyzyqtyrdy: olardyń baǵalaýynsha, koronavirýs pandemiiasy 10 jylǵa sozylmaq. Bizge osy virýspen ómir súrip úirený kerek. Aýrýdyń taralýy taǵy da kúsheidi. Mundai qiyn jaǵdaida azamattardan batyl sheshimder qabyldaý talap etiledi, sol sebepti barlyǵyna vaktsina alý kerek», - dedi Ózbekstan prezidenti.
Ol úkimettiń ár azamat úshin kúresetinin jáne bul iske kerekti qarajatty jumsaitynyn atap ótti. Sonymen qatar azamattardyń da óz ómiri men densaýlyǵy úshin jaýapty ekenin eske saldy. «Vaktsina alǵandar aýrýhanadan tórt kún ishinde shyǵyp jatyr, al ekpe almaǵandar qatty aýyrýda. Iá, vaktsina alǵannan keiin de aýrýdy juqtyrýyńyz múmkin, alaida bul jaǵdaida aýrý jeńil ótedi», dep atap ótti Shavkat Mirziioev.
Eske sala keteiik, epidemiologiialyq ahýaldyń órshýine bailanysty Ózbekstanda 28 shildeden bastap karantindik sharalar kúsheitildi. 17 shilde kúni Koronavirýspen kúres jónindegi arnaiy komissiia 18 jastan joǵary saýda, qoǵamdyq tamaqtandyrý, qyzmet kórsetý jáne bilim salasyndaǵy azamattardy, sonymen qatar áskeriler men quqyq qorǵaý organdarynyń qyzmetkerlerin mindetti vaktsinalaý týraly sheshim qabyldady. Qazirgi kezde Ózbekstan Respýblikasynyń Parlamenti halyqtyń jumys isteitin bóligin mindetti vaktsinalaý týraly zań jobasyn qarastyrýda.
