Mádeniet jáne sport ministrligi «Saryarqa» velotregin jedel basqarýǵa berý máselesi boiynsha túsinikteme berdi, dep habarlaidy "Ult aqparat" vedomstvonyń saityna silteme jasap.
«2021 jyly aqpan aiynda «Qazaqstandyq velosiped sporty federatsiiasy» QB Qazaqstan Respýblikasynyń «Memlekettik-jekeshelik áriptestik týraly» Zańyna sáikes ministrlikke «Saryarqa» respýblikalyq velotregi negizinde UCI halyqaralyq spýtnik ortalyǵyn qurý jáne balalar sportyn damytý ortalyǵyn ashý» memlekettik-jekeshelik áriptestik jobasyn joldady. MJÁ qaǵidattarynyń biri teńgerimdilik qaǵidaty – memlekettik-jekeshelik áriptestik jobasyn iske asyrý protsesinde memlekettik áriptes pen jekeshe áriptes arasynda mindetterdi, kepildikterdi, táýekelder men kiristerdi ózara tiimdi bólý», delingen habarlamada.
Vedomstvonyń málimetinshe, Ulttyq ekonomika ministri m.a. «Memlekettik-jekeshelik áriptestik jobalaryn josparlaýdyń jáne iske asyrýdyń keibir máseleleri týraly» 2015 jylǵy 25 qarashadaǵy № 725 buiryǵyna sáikes «Qazaqstandyq velosiped sporty federatsiiasy» QB jobalyq qujattamaǵa saraptama júrgizý jáne MJÁ kelisim sharttaryn talqylaý boiynsha tikelei kelissózderdiń qatysýshysy dep tanylǵan.
«Qazirgi tańda tikelei kelissózder protsesi júrip jatyr, sonymen qatar jeke serikteske talaptar qoiylady jáne esepteýler taldanady. MJÁ mehanizmi sheńberinde obektini jeke menshikke ielikten shyǵarý quqyǵynsyz tek ǵimaratty jedel basqarýǵa ǵana beriledi. Al barlyq sport komponentteri, olardyń ishinde 17 jazǵy olimpiadalyq sport túrinen sportshylar daiyndyqty júzege asyratyn Olimpiadalyq daiarlaý ortalyǵy burynǵydai ministrliktiń qaraýynda qalady. Jobany júzege asyrý barysynda Olimpiadalyq daiarlaý ortalyǵynyń sportshylary atalǵan obektige kedergisiz kire alatyndyǵyn atap ótken jón, ol óz kezeginde olimpiadalyq rezervtiń daiyndalýyna keri áserin tigizbeidi», delingen ministrliktiń habarlamasynda.
Vedomstvonyń málimetinshe, joba «Saryarqa» respýblikalyq velotregi negizinde UCI halyqaralyq spýtnik ortalyǵyn quryp jáne balalar sportyn damytý ortalyǵyn ashady.
«Jeke seriktes UCI halyqaralyq spýtnik ortalyǵyn qurý boiynsha jáne sportshylar men jattyqtyrýshy-oqytýshylar quramyn daiyndaý jáne biliktilikterin arttyrý boiynsha halyqaralyq akkreditteýdi alý jáne balalarǵa arnalǵan halyqaralyq bilim berý baǵdarlamalaryn engizýmen birge balalar sportyn damytý ortalyǵyn qurý boiynsha qyzmet kórsetetin bolady. Sonymen qatar, áleýmettik baǵyttalǵan atalǵan MJÁ jobasy aiasynda az qamtylǵan jáne kóp balaly otbasydan shyqqan, múgedek jáne jetim balalar úshin tegin sektsiialar qarastyrylǵan», delingen habarlamada.
Sondai-aq, paravelosporttyń damýyna erekshe kóńil bólinbek.
«Osylaisha Qazaqstandyq velosiped sporty federatsiiasy Ulttyq paraolimpiadalyq komitetiniń tanýyna ie bolyp, atalmysh baǵytty Qazaqstanda qosymsha damytady. Jeke seriktes maqsatyna sáikes joba sheńberinde qazaqstannyń sportshylarynan ǵana qurylǵan Nur-Sultan Cycling Team trektegi velosiped komandasyna qoldaý kórsetiledi. Balalar sportyn damytý ortalyǵymen qosa , trekten ulttyq velokomandanyń bolýy jas urpaqtyń velosiped sportyna qyzýǵyshylyǵyn arttyra otyryp, balalar úshin qolaily ortany jasaidy. MJÁ kelisim sharttarynyń merzimi aiaqtalǵannan keiin, jeke seriktes, MJÁ týraly kelisim sharttaryna sáikes, obektini memlekettik serikteske tiisti tehnikalyq jaǵdaida qaitarýǵa mindetti», delingen habarlamada.
Vedomstvonyń túsindirýinshe, sport salasynda MJÁ sport infraqurylymyn jańartý jáne jaqsartý úshin, jeke seriktesterden investitsiialardy tartýǵa baǵyttalǵanyn eskerý qajet. Sport obektilerin jeke qurylymdarǵa berý boiynsha jobalar da atalǵan maqsatty kózdeidi.
