QR Ekologiia, geologiia jáne tabiǵi resýrstar vitse-ministri Ahmetjan Pirimqulov reseilik «TNT-daǵy bi» shoýynda óner kórsetip, Óskemenniń ekologiiasyna qatysty másele kótergen Shyńǵyshan Qabdyhalyqtyń synyna jaýap berdi, dep habarlaidy "Ult aqparat".
Aita ketsek, osydan birneshe kún buryn reseilik «TNT-daǵy bi» shoýynda óner kórsetken Shyńǵyshan Qabdyhalyq Óskemen qalasynyń ekologiiasyna qatysty atalmysh telearnada syn aitqan edi. Jas jigit Reseige keter aldynda eki qaryndasynyń jótelip, ystyǵy kóterilip, aýrýhanaǵa jatyp qalǵanyn, osynyń bári zaýyttar aýaǵa taratatyn las qaldyqtardyń kesirinen ekenin aitady.
Bul máselege qatysty ministrliktiń ustanymy qandai ekenin búgin OKQ-daǵy baspasóz máslihatynda QR Ekologiia, geologiia jáne tabiǵi resýrstar vitse-ministri Ahmetjan Pirimqulov aityp berdi
«Shyǵys Qazaqstan, Pavlodar, Qaraǵandy oblystaryndaǵy bul máselelerdi bilemiz. Qala ishinde úlken zaýyttar bar. Qazirgi tańda ekologiiany jaqsartý maqsatynda kóp jumys istelip jatyr. Jańa ekologiialyq kodekste eń ozyq ári qoljetimdi tehnologiialardy engizý ádisimen másele birshama sheshiler dep oilaimyz. Óskemen, Pavlodar, Qaraǵandy qalalarynda qorshaǵan ortaǵa emissiia kóptep shyǵarylady. Búgingi kúni jańa ekologiialyq kodekstiń jańashyldyqtary osy máseleni sheshedi dep oilaimyz», - dedi Ahmetjan Pirimqulov.
Eske sala ketsek, buǵan deiin Ahmetjan Pirimqulov jeltoqsan aiynda Parlamentke engiziletin jańa ekologiialyq kodeks jobasy qoldanystaǵy zańnamaǵa birqatar ózgeris engizýdi kózdeitinin habarlaǵan edi.
