Keibir BAQ pen áleýmettik jelilerde 6-7 jyl ishinde qazaqstandyq mektepterde orys tilinde oqytatyn synyptar jabylatyny týraly aqparat tarap jatyr. Bul shyndyqqa janaspaidy, dep jazady Stopfake.kz saity.
«Qazaqstanda orys mektepteriniń bolashaǵy bar ma?» materialy eki jyl buryn 31 arnada «Informbiýro» efirinde shyqqan. Oǵan elordadaǵy №90 gimnaziianyń direktory Aiatjan Ahmetjanulynyń pikiri usynylǵan BAQ-taǵy aqparat negiz bolǵan.
Siýjette orta bilim berý salasyndaǵy úrdister talqylandy. Sondai-aq orys tildi mektepterdegi oqýshylar sanynyń azaiýy sóz boldy. Gimnaziia direktory qalǵan oqýshylar bolashaqta básekege qabiletsiz bolyp qalýy múmkin degen pikirin bildirip, ata-analardy memlekettik tildi meńgerý úshin balalardy qazaq mektepterine berýge shaqyrdy. Sonymen qatar siýjette Bilim sarapshylarynyń qazaq ligasynyń vitse-prezidenti Natalia Dreittiń de pikiri usynyldy. Ol orys jáne qazaq mektepteri toly jáne másele - muǵalimderdiń jetispeýshiliginde, al bul jaǵdaidy pedagogterdiń mártebesi týraly zań ózgertýi tiis dep málimdedi. Búginde bul material pablikterde ádeii burmalanyp jariialanýda», – dep túsindirdi «31 arna» ókilderi.
Sondai-aq, Oqý-aǵartý ministrligi de orys tilinde oqytatyn synyptardy jabý týraly aqparatqa qatysty túsinikteme berdi.
«Bul aqparat shyndyqqa janaspaidy. Qazaq synyptarynda da, orys tilinde oqytatyn synyptarda da orys tili burynǵydai oqytylady, basqa jospar joq», – dedi vitse-ministr Sholpan Karinova.
