Ǵylym jáne joǵary bilim ministrligi tehnikalyq qatege bailanysty grantynan aiyrylǵan túlektiń máselesin sheshkenin málimdedi, - dep habarlaidy "Ult aqparat" vedomstvonyń baspasóz qyzmetine silteme jasap.
Mektep túlegi Tastan Jasmin Qýanyshqyzy memlekettik bilim grantynyń konkýrsyna qatysý úshin M.Áýezov atyndaǵy Ońtústik Qazaqstan ýniversitetine qujat tapsyrǵan. Al qabyldaý komissiiasynyń mamany UBT sertifikattaryn tańdaý kezinde tehnikalyq qatelik jiberip alǵan. Osydan keiin grant iegerleriniń tizimi jariialanǵanda balasynyń oqýǵa túspegenin bilgen ata-ana atalǵan oqý ornynyń basshylyǵyna jáne ministrlikke aryzdandy.
"Búgin Ǵylym jáne joǵary bilim ministrligi ókilderi bul máseleni nazarǵa alyp, shuǵyl sheshim qabyldady. Ministrdiń keńesshisi túlektiń ata-anasymen sóilesip, ketken qatelik úshin ministr men ministrliktiń atynan keshirim surady. Tehnikalyq qatelik tez arada túzetilip, talapker Tastan Jasmin Qýanyshqyzy úshin Súleimen Demirel atyndaǵy ýniverisitetke grant bólinetin boldy. Sondai-aq, ol jataqhanamen qamtylady" - delingen habarlamada.
Al, qujat qabyldaýda qatelik jibergen M.Áýezov atyndaǵy Ońtústik Qazaqstan ýniversiteti qabyldaý komissiiasynyń mamanyna «sógis» berilgen.
Sondai-aq, Ǵylym jáne joǵary bilim ministri Saiasat Nurbek apparat basshylaryna jáne Joǵarǵy oqý oryndary rektorlaryna talapkerlerdiń qujattaryn qabyldaý barysynda muqiiat bolýdy eskertken.
