QR Memlekettik qyzmet isteri agenttigi tóraǵasynyń orynbasary Marat Dáýeshov ministr Ashat Aimaǵambetovtiń úlken mólsherde syiaqy alǵany týraly aqparatqa qatysty pikir bildirdi, dep habarlaidy "QazAqparat" HAA.
«Ákimder men ministrlerdiń jalaqysy 1 mln teńgeden 2 mln teńgege deiin óskenin jaqsy bilemiz. Byltyr memlekettik qyzmetshilerdiń sany 25 paiyzǵa deiin qysqardy. Ákimder men ministrlerdiń jalaqysy osy qysqartylǵan 25 paiyz memlekettik qyzmetshiniń esebinen kóterildi me?», - dep surady BAQ ókili ortalyq kommýnikatsiialar qyzmetinde ótken brifingide.
Bul suraqqa QR Memlekettik qyzmet isteri agenttigi tóraǵasynyń orynbasary Marat Dáýeshov jaýap berdi.
«Memlekettik qyzmetshilerdi ońtailandyrý jumystary qazir dep júrgizilýde. Osy jyldyń sońyna deiin 15 paiyzǵa deiin qysqartylady. Kelesi jyly 10 paiyzǵa deiin qysqartylady.
Al ailyqqa kelsek, jergilikti organdarda ailyq 90 paiyzǵa kóterildi», - dedi agenttik bashysynyń orynbasary.
Sondai-aq, ol QR Bilim jáne ǵylym ministriniń byltyrǵy syiaqysy týraly pikir bildirdi.
«Byltyr ministr Ashat Aimaǵambetov 15 mln teńge kóleminde syiaqy aldy degen aqparat shyqty. Zań turǵysynan, memlekettik qyzmetshiniń etikasy turǵysynan basshynyń ózine osynsha syiaqy alýy qanshalyqty durys?», - dep surady jýrnalist.
«Memlekettik organda osyndai ekonomiia (qarjy únemdeý– red.) bolsa, ondai múmkin». – dep qysqa qaiyrdy Marat Dáýeshov.
