Ekologiia, geologiia jáne tabiǵi resýrstar ministri Serikqali Brekeshev Almaty oblysynda qasaqana jol talǵamaityn kólikpen jylqyny basqan júrgizýshiniń oqiǵasy týraly aitty, - dep habarlaidy Tengrinews.kz.
"Shynymdy aitsam, bul videony kórgen joqpyn. Bul jerde oblystyń Ishki ister departamenti (Politsiia departamenti - esk.) anyqtaýy kerek, bul solardyń jumysy. Áńgime janýarlarǵa jaýapkershilikpen qaraý týraly zań jobasyna qatysty bolsa, onda, árine, ol úi janýarlaryn da qarastyrady. Jylqy – aýyl sharýashylyǵy janýary, sondyqtan olar jeke zańmen retteledi", - dedi Brekeshev Ortalyq kommýnikatsiialar qyzmetinde ótken baspasóz máslihatynda jýrnalisterdiń suraǵyna jaýap berip.
Ministrdiń aitýynsha, flora men faýnaǵa bala kezden uqypty qaraýdy qalyptastyrý qajet.
"Qorshaǵan ortaǵa, onyń ishinde janýarlarǵa degen kózqarasymyzdy ózgertý kerek ekeni anyq. Bul jerde qoǵamnyń tárbielik rolin, sana deńgeiin joǵarylatý qajet. Bul máseleni jai ǵana zań jobalarymen nemese zańnamany únemi qataitý arqyly sheshý múmkin emes. Bul máseleni túbegeili sheshpeidi, sondyqtan sanany, onyń ishinde bala kezden bastap ózgertý kerek", - dedi ekologiia ministri.
