Aýyl sharýashylyǵy ministri Erbol Qarashókeev «Jeke qosalqy sharýashylyq týraly» zań jobasynyń negizgi baǵyttaryna qatysty túsinik berdi, dep habarlaidy QazAqparat.
«Búgingi tańda atalǵan zań jobasy ázirlendi. Zań jobasynyń birinshi nusqasy «Ashyq normativtik quqyqtyq aktiler» saitynda ornalastyryldy. Talqylaý barysynda biz 1600-ge jýyq eskertý men usynys aldyq. Atalǵan zań jobasynyń negizgi jańalyqtary mynalar: jeke qosalqy sharýashylyq qyzmetiniń zańnamalyq negizin qurý. Ókinishke qarai, bul – adam qyzmetiniń zańmen rettelmegen salalarynyń biri. Onyń mártebesi de aiqyndalmaǵan. Biz zań jobasynda jeke qosalqy sharýashylyqty azamattyń jaldamaly jumys kúshin tartpaityn kásipkerlik emes qyzmeti retinde tirkedik. Ekinshiden, kooperativter arqyly olarǵa memlekettik qoldaý sharalaryn kórsetý úshin normalar engizildi», - dedi Qarashókeev Ortalyq kommýnikatsiialar qyzmetinde.
Budan bólek ministr jergilikti atqarýshy organdarǵa jergilikti múmkindikter esebinen jeke qosalqy sharýashylyqtarǵa qoldaý kórsetý, jergilikti biýdjetterge tiisti shyǵyn baptaryn engizý ókilettikteri beriletinin atap ótti.
«Munyń bári jeke qosalqy sharýashylyqtarǵa qatysty ádiletsizdikti joiý úshin óte mańyzdy. Al ol ádiletsizdiktiń bary ras. Atap aitqanda, búginde elde 1,6 mln jeke qosalqy sharýashylyq bar, onda eldiń mal basynyń jartysyna jýyǵy shoǵyrlanǵan, olar is júzinde memleket tarapynan eshqandai qoldaý almai-aq eldiń ishki naryǵynyń mal sharýashylyǵy ónimderine degen qajettiliktiń jartysyna jýyǵyn qanaǵattandyryp otyr. Sonymen qatar olardy jaiylymdyq jerlermen jáne azyqpen qamtamasyz etý máseleleri áli de sheshilmegen. Bul problema jyl ótken saiyn erekshe ózektilikke ie bola túsýde. Muny biylǵy qurǵaqshylyq dáleldep berdi, osynyń saldarynan Mańǵystaý oblysy qatty zardap shekti», - dedi ministr.
«Shyn máninde, biyl bizdegi mal sharýashylyǵy salasynyń aýa raiy jaǵdaiyna barynsha osal ekenin kórsetti. Keshe ǵana men óńirlerden kelgen fermerlermen kezdestim. Olardy tyńdaǵannan keiin men bul máseleni sheshý úshin bir rettik is-sharalar emes, júieli sharalar qajet ekenine taǵy da kóz jetkizdim», - dedi vedomstvo basshysy.
