Ishki ister ministri Erlan Turǵymbaev qaza tapqandardyń otbasyna kóńil aitty, dep habarlaidy "Ult aqparat".
«Biz úshin búgin óte aýyr kún, orny tolmas qaiǵy. Aidyń kúnniń amanynda Almaty qalasyndaǵy qaiǵyly oqiǵa nátijesinde 5 azamatymyz oqqa ushty. Onyń ishinde ishki ister organdarynyń eki qyzmetkeri bar. Politsiia maiory Darhan Súleev pen politsiia kapitany Nurbol Baiǵaziev óz jumystaryn adal atqaryp júrgen qatardaǵy qyzmetkerler edi.
Qazaqtyń dańqty batyry Baýyrjan Momyshulynyń «Adam bolý – qasiet, azamat bolý – mindet, patriot bolý – paryz» degen qanatty sózi bar.
Olar adamgershilikterimen ainalasyna abyroily bolyp, otansúigishtikterimen talaiǵa úlgi bola bildi. Adam retinde qalyptasty, azamat bolyp atqa qondy, patriottyq bolmysymen el tynyshtyǵyn qorǵady.
Darhan Súleev ishki ister salasynda 18 jyl qyzmet atqarsa, Nurbol Baiǵaziev 7 jyldan beri sapta qyzmet etip keldi. Olardy áriptesteri qyzmetine adal, dostyqqa berik, júregi úlken azamat retinde máńgi este saqtaidy.
Marqumdardyń áke-sheshesi, otbasy, týǵan-týystaryna kóńil aityp, qaiǵylaryna ortaqtasqym keledi.
Jany jánnatta, topyraǵy torqa, imany joldas bolsyn», - dep jazdy Erlan Turǵymbaev áleýmettik jelidegi paraqshasynda.
Aita keteiik, 20 qyrkúiekte keshke Almatyda atys boldy. 54 jastaǵy er adam úiden shyǵarý týraly sot sheshimin oryndaýǵa kelgen sot oryndaýshysyna, politsiia qyzmetkerlerine jáne aýlada bolǵan ózge eki adamǵa ańshy myltyǵynan oq jaýdyrǵan. Nátijesinde bes adam qaza tapty. Eki politsiia qyzmetkeri, bir jeke sot oryndaýshysy jáne eki turǵyn. Olardyń biri - úidiń jańa iesi, ekinshisi - onyń tanysy.
1967 jyly týǵan kúdikti ustaldy. Ol 20 jylǵa nemese ómir boiyna deiin bas bostandyǵynan aiyrylýy múmkin.
