Ishki ister ministri Erlan Turǵymbaev óz ómirine qaýipti bolǵanyna qaramastan tereńdigi eki metrden asatyn qudyqqa túsip ketken bes jastaǵy balany qutqaryp alǵan 10-synyp oqýshysy Nadir Omarǵazievpen kezdesti. Bul týraly Qazaqstan Respýblikasy IIM Baspasóz qyzmeti habarlaidy.
Bes jastaǵy bala Astana qalasynda anasymen kóshede kele jatqanda qudyqqa túsip ketken. Osy kezde Nadir dosymen birge kolledjden kele jatqan bolatyn. Jylap jatqan eki áieldi kórip, olardyń janyna baryp kelip, ne bolǵanyn suraǵan. Sodan soń ol birden sheshim qabyldap, qudyqqa túsýge umtyldy, onyń ishine qulap ketýi de múmkin edi.
Erlan Turǵymbaev Tótenshe jaǵdailar jónindegi komitettiń jeke quramynyń qatysqan jiynda mektep oqýshysyn kórsetken qyraǵylyǵy, batyrlyǵy jáne qaisarlyǵy úshin alǵysyn bildirdi. Onyń jedel de batyl is-qimylynyń arqasynda bala ómiri ajaldan qutqaryldy.
«Osyndai balalardyń erlik áreketteri men ózgege degen janashyrlyq sezimi qurmetteýge turarlyq. Bireýdiń ómirine arasha turý úshin kez kelgen adam táýekelge bara almaidy», - dep atap ótti ministr.
Budan soń mektep oqýshysyna «Tótenshe jaǵdaidaǵy erligi úshin» tós belgisin taǵyp, smartfon syilady.
Sonymen qatar, E. Turǵymbaev Nadir Omarǵazievke tárbie bergen ata-anasyna, ustazdary men tálimgerlerine alǵys bildirdi. Ol batyl bala tárbielep ósirgeni úshin ata-anasyn alǵys hatpen marapattap, Qazaqstanda osyndai er júrek balalar kóp bolsa, elimizdiń bolashaǵyna aǵa urpaqtyń alańdamaýyna bolatynyn atap ótti.
Sóz sońynda Ishki ister ministri Nadirdiń bolashaqta qutqarý mamandyǵyn tańdaitynyna senimdi ekendigin bildirdi, óitkeni qaisarlyq pen kómekke daiyn bolý órt sóndirýshi men qutqarýshynyń eń basty qasietteriniń biri. Sonymen qatar Ishki ister ministri batyr balany IIM-niń joǵary oqý oryndaryna oqýǵa shaqyrdy.
