Shekarada 10 ótkizý pýnktin qaita qurý jumystary bastaldy. Bul týraly QR Qarjy ministri Erulan Jamaýbaev aitty, dep habarlaidy QazAqparat.
«Qarjy ministrligi salyqtyq jáne kedendik ákimshilendirýdi odan ári jetildirý men tsifrlandyrýdy jalǵastyratyn bolady. Bul keshendi sharalardy iske asyrýmen bailanysty. Birinshiden, táýekelderdi basqarý júiesinde jasandy intellekt qoldaný adami faktordy boldyrmaýǵa jáne biýdjetke túsetin túsimderdi ulǵaitýǵa múmkindik beredi. Sondyqtan, jasandy intellektti jetildirýge erekshe kóńil bólinedi. Ekinshiden, iri salyq tóleýshilerdiń «Gorizontaldy monitoring» jobasyn barynsha keńeitý. Jobanyń negizgi maqsaty - salyq tóleýshilerdiń táýekel operatsiialary men olardyń salyq zańnamasyn buzý týraly aqparattaryn salyq tóleýshilerdiń aqparattyq júielerinde onlain-qoljetimdilik ornatý arqyly ýaqytyly eskertý. Bul iri kásiporyndarǵa aiyppul salmai taza jumys isteýine jáne shyǵyndaryn azaitýǵa múmkindik beredi», - dedi Jamaýbaev Májilistegi Úkimet saǵatynda.
Ministr «Tiisti saqtyq» printsipin jetildirýge toqtaldy. Bul bizneske josyqsyz kontragenttermen mámileler jasaý táýekelin boldyrmaýǵa kómektesedi. Sondyqtan, osy baǵytta ministrlik «Atameken» ulttyq kásipkerler palatasymen yntymaqtasa otyryp, jumys isteidi.
«Ekonomikalyq yntymaqtastyq jáne damý uiymy jáne Ulttyq bankpen elektrondyq málimetter almasý aiasynda, salyq salý maqsatynda, Qazaqstan azamattarynyń qarjylyq shottary boiynsha EYDU-ǵa kiretin 100-den astam sheteldik iýrisdiktsiialarda aqparat almasa alamyz», - dedi vedomstvo basshysy.
Sonymen qatar ol kedendik infraqurylymdy jańǵyrtý jáne transshekaralyq saýdany baqylaýdy kúsheitýge toqtaldy.
«Aldynda aityp ótkendei, 10 ótkizý pýnktin qaita qurý/jańǵyrtý jumystary bastaldy. Ony 2024 jylǵa deiin aiaqtaý josparlanýda. Nátijesinde, bizde zamanaýi standarttarǵa tolyq jaýap beretin ótkizý pýnktteri bolady.
Jaqynda zańsyz saýda ainalymymen kúresýge jáne kedendik ákimshilendirýdi jetildirýge baǵyttalǵan memlekettik shekarada zańsyz saýda ainalymyna qarsy is-qimyldyń keshendi jospary qabyldandy», - dedi Jamaýbaev.
