Densaýlyq saqtaý ministri Ajar Ǵiniiat koronavirýs juqtyrý jaǵdailary qai kezde azaiatynyn aitty, dep habarlaidy Sputnik Qazaqstan.
Ministrlik mamandary virýstyń ereksheligin, naýqastardyń sanyn jáne aýrýdyń taralýyn eskere otyryp, epidemiologiialyq jaǵdaidyń boljamyn jasap shyqty.
"Oǵan sáikes, tamyz aiynda koronavirýstyq infektsiianyń ortasha táýliktik sany 4 000 jaǵdaiǵa deiin ósedi. Al qyrkúiek aiynda tómendeidi dep boljap otyrmyz", - dedi Ǵiniiat Úkimettiń búgingi otyrysynda.
Osy oraida Densaýlyq saqtaý ministri vaktsinatsiia men revaktsinatsiia jasaý qajettigin taǵy bir márte eskertti. Sonyń arqasynda virýstyń taralýyn tejeýge bolady.
"Qazirgi ýaqytta vaktsinatsiia men revaktsinatsiia jasaý úshin ekpeniń úsh túri bar. Olar – QazVac, Sinopharm jáne Pfizer. Jalpy, 1 million 350 myńnan doza bar", - dep atap kórsetti Ǵiniiat.
Budan bólek, jyldyń aiaǵyna deiin QazVac pen Pfizer-diń qosymsha partiiasy satyp alynady.
Aita keteri, búgin jariialanǵan aqparat boiynsha sońǵy bir táýliktiń ishinde Qazaqstanda koronavirýs infektsiiasyn juqtyrýdyń 2021 jaǵdaiy tirkeldi. Basym bóligi Nur-Sultan men Almaty qalasyna tiesili. Qaraǵandy oblysynda naýqastardyń sany kóbeiip keledi.
