QR Densaýlyq saqtaý ministri Aleksei Tsoi otandastaryn koronavirýstan óz betinshe emdelmeýge shaqyrdy, dep habarlaidy "Ult aqparat".
Ortalyq kommýnikatsiialar qyzmetinde ótken brifing barysynda BAQ ókili ministrge: «Densaýlyq saqtaý ministrliginiń ózin-ózi emdeýge qatysty ustanymy qandai? Qazir WhatsApp chattarynda Lianhýa Tsinven kapsýlasy syndy qytai dárisine qatysty aqparat tarap júr. Atalǵan dáriniń resmi satylatyndyǵyna da kúmán bar. Atalǵan kapsýla men ózge de qytai dárileri dári-dármek tizilimine jáne emdeý hattamasyna kire me?», - dep suraǵan edi.
«Biz azamattarǵa ózin-ózi emdeýmen múldem ainalyspaýǵa keńes beremiz. Óitkeni, aýrýlardyń barlyǵy birdei birden baiqala bermeidi. Keibir aýrýlardyń, onyń ishinde koronavirýs infektsiiasynyń da qatparlanýy jii baiqalady. Dárilik zatty taǵaiyndaý týraly sheshimdi dáriger ǵana qabyldaýy tiis ekendigin túsiný óte mańyzdy», - dep jaýap berdi Aleksei Tsoi.
Sonymen qatar Densaýlyq saqtaý ministri Lianhýa Tsinven kapsýlasy biologiialyq belsendi qospa ekendigin, onyń elimizde tirkelýine qatysty málimet alý úshin tiisti vedomstvoǵa habarlasý qajettigin aitty.
«Eger preparat Qazaqstanda tirkelmese, onda respýblika aýmaǵynda taratýǵa ruqsat joq. Mundai jańa zattar kóbine biologiialyq belsendi qospa retinde tirkeledi jáne emdeýdiń klinikalyq standartyna kirmeidi», - dedi ol.
