"Baiqońyr" ǵarysh ailaǵynda qurylatyn "Báiterek" kesheninen ushyrylatyn "Soiýz-5" zymyrandary ekologiialyq jaǵynan taza otyndy paidalanady. Bul týraly búgin Tsifrlyq damý, innovatsiialar jáne aeroǵarysh ónerkásibi minstri Asqar Jumaǵaliev málimdedi, dep habarlaidy Sputnik Qazaqstan.
Búgin Májilistiń jalpy otyrysynda Qazaqstan Úkimeti men Resei Úkimeti arasyndaǵy "Baiqońyr" ǵarysh ailaǵynda "Báiterek" ǵarysh zymyran keshenin qurý týraly zań jobasy qaraldy.
Depýtat Bekbolat Tileýhan "Báiterek" kesheninen ushyrylatyn zymyrandardyń ekologiialyq qaýipsizdigi máselesin kóterdi. Ol hattamanyń 1-babynda "Báiterek" kesheni ekologiialyq qaýipsizdik deńgeii joǵary zymyran tasyǵyshtardy ushyrýǵa arnalǵany jazylǵanyn atap ótti.
"Zymyrandardy ushyrý qoǵamda qorshaǵan ortaǵa jáne halyqtyń densaýlyǵyna áser etýine qatysty úlken alańdaýshylyq týǵyzyp otyr. Kezinde "Protondardyń" qulaǵanyn bilemiz. Osyǵan bailanysty men mynany anyqtap alǵym keledi: "Báiterek" kesheninen ushyrý úshin qandai zymyran tasyǵyshtar qoldanylady? Búgin paidalanylyp otyrǵan, qorshaǵan ortaǵa ziiandy áser etetin baiaǵy "Protonnan" qandai aiyrmashylyǵy bar?", - dep surady ol.
Ministr depýtattyń "Baiqońyrdan" ushyrylǵan "Proton" zymyran tasyǵyshy ekologiiaǵa ziian keltiredi degen ýájimen kelisti.
"Óitkeni, bul zymyran tasyǵysh geptil otynyn paidalanady. Al "Soiýz-5" geptil otynyn paidalanbaidy, onyń ornyna ottegi men kerosin otyny qoldanylady. Ol ekologiiaǵa ziian tigizbeidi. Ekologiia jaǵynan eshqandai másele bolmaidy", - dep sendirdi Jumaǵaliev.
Vedomstvo basshysy "Soiýz-5" zymyran tasyǵyshy kommertsiialyq jaǵynan da "Protonmen" salystyrǵanda áldeqaida artyq ekenin atap ótti.
